GMP სტანდარტები იმპორტიორებსაც მოეთხოვებათ – ცვლილება დაჩქარებული წესით ამოქმედდება

მედიკამენტების იმპორტიორი კომპანიებისთვის პროდუქტის GMP-ის (კარგი საწარმოო პრაქტიკის) სტანდარტით წარმოების დამადასტურებელი საბუთის წარდგენა სავალდებულო ხდება.

მთავრობამ „წამლისა და ფარმაცევტული საქმიანობის შესახებ“ კანონში ცვლილებებათა პროექტი დღევანდელ სხდომაზე განიხილა.

GMP-ის სტანდარტის დოკუმენტის, სავალდებულო წესით წარდგენის ეტაპობრიობასა და პირობებს მიმდინარე წლის მარტამდე საქართველოს მთავრობა განსაზღვრავს.

“დაჩქარებული წესით შეგვაქვს ცვლილება და იმპორტიორ კომპანიებს GMP-სერტიფიკატები მოეთხოვებათ”, – თქვა ჯანდაცვის მინისტრმა ზურაბ აზარაშვილმა მთავრობის სხდომის დასრულების შემდეგ.

მისივე განცხადებით, ცვლილების მიზანია, უზრუნველყოფილი იყოს თანაბარი მიდგომები ფარმაცევტული პროდუქტის მწარმოებლებს, საბითუმო რეალიზატორებსა და იმპორტიორებს შორის.

2022 წლის 1-ელი იანვრიდან ძალაში შევიდა ადგილობრივი მწარმოებლებისთვის GMP-სერტიფიკატზე გადასვლის აუცილებლობა. "იმის გამო, რომ თანაბარ პირობებში ყოფილიყვნენ ადგილობრივი კომპანიები და იმპორტიორები, დაჩქარებული წესით შეგვაქვს ცვლილება და იმპორტიორებს მოვთხოვთ GMP-სერტიფიკატს. გარდა ამისა, იმისათვის, რომ კარგად და ხარისხიანად ვაკონტროლოთ წამლის ხარისხი, წელს შევქმნით წამლის ლაბორატორიას და ამისთვის ბიუჯეტიდან 6 მლნ ლარამდე გამოიყოფა. ლაბორატორიის მოსაწყობად პროცესი დაწყებული გვაქვს“, – განაცხადა ზურაბ აზარაშვილმა.

მთავრობა პარლამენტს კანონპროექტის დაჩქარებული წესით განხილვის თხოვნით მიმართავს.