“ღვარძელაშვილის მარნის“ დამფუძნებელმა ბუტიკ სასტუმროს მშენებლობა გადადო

“ღვარძელაშვილის მარნის“ დამფუძნებელმა გიორგი ღვარძელაშვილმა „ბიზნესპარტნიორთან“ განაცხადა, რომ ბუტიკ სასტუმროს მშენებლობა გადადო.მისი ინფორმაციით,მიზეზი ფინანსებია, რეინვესტიციისთვის გათვალისწინებული თანხები კი საწყის ეტაპზე მარნის და ვენახების გაფართოებას მოხმარდება.

როგორც ღვარძელაშვილი აცხადებს, მხოლოდ მარნის გაფართოებაში 20 000 -25 000 ლარის ინვესტიცია დაიხარჯება.

„ამ დროისთვის კომპანია 5 ჰა-ს ვენახს ფლობს სოფელ კონდოლში, წლის ბოლომდე ვენახები 6 ჰა-მდე გაფართოვდება,სამომავლოდ კი დაგეგმილია მისი 8-10 ჰა-მდე გაზრდა,“-აცხადებს ღვარძელაშვილი. 

თელავის რაიონის სოფელ კონდოლში,5 ჰექტარ მიწის ფართობზე, ღვარძელაშვილი აწარმოებს 3 დასახელების ბიო ღვინოს საფერავი,კონდოლური და ჟღია.

წელს “ღვარძელაშვილის მარანში“  6 500 ბოთლამდე ღვინის წარმოება იგეგმება, აქედან უდიდესი ნაწილი საექსორტო იქნება. გიორგი ღვარძელაშვილის ინფორმაციით, ადგილობრივად ღვინო მხოლოდ ორ ღვინის ბარში იყიდება. ექსპორტიორ ქვეყნები კი ამერიკა, გერმანია, ჩეხეთი, პოლონეთი და ჰოლანდიაა.  წლის ბოლომდე ექსპორტიორ ქვეყნებს საფრანგეთი და იტალიაც მიემატება.

„ღვარძელაშვილის მარანი“ ღვინოს 2014 წლიდან აწარმოებს.