"გემუანის" პროდუქცია ამერიკის ბაზარზე რამდენიმე კვირაში გამოჩნდება
მშრალი ხილის მწარმოებელი კომპანია „გემუანი“ რამდენიმე კვირაში პროდუქციას ამერიკის ბაზარზე გაიტანს.
როგორც „ბიზნესპარტნიორს“ კომპანიის დამფუძნებელმა ნონა თორდიამ განუცხადა, პირველი პარტია მცირე იქნება, დაახლოებით 1 კონტეინერი.
„გვინდოდა პროდუქციის Amazon-ის საშუალებით გაყიდვაც, თუმცა, ეს დროებით გადაიდო. შესაბამისი შეფუთვები არ გვაქვს, ამაზე ვმუშაობთ, მოლაპარაკების პროცესში ვართ,“ - აცხადებს თორდია.
ამ დროისთვის კომპანიის წარმადობა წელიწადში 24-30 ტონაა.
„გემუანი“ 2020 წლის ივნისიდან შვეიცარიული ტრანსნაციონალური კომპანია Nestle-ს მიმწოდებელია. შესაბამისად, „გემუანი" Nestle-ს რუსეთის ფილიალს ინგრედიენტებით ამარაგებს. თორდია აცხადებს, რომ ქართული კომპანია Nestle-ს საშუალოდ 2 თვეში ერთხელ დაახლოებით 1.5 ტონა პროდუქციას უგზავნის.
სუბლიმირებული ხილის საწარმო „გემუანი“ სამეგრელოში მდებარეობს. კომპანია 2011 წელს დაარსდა და მის მფლობელობაშია 100 ჰა-მდე საერთო ფართობის მიწის ნაკვეთები, სადაც მდებარეობს ხილ-ბოსტნეულის გადამამუშავებელი საწარმო. უშუალოდ ხილის გადამამუშავაბელი საწარმო 2017 წლიდან ფუნქციონირებს.
