"გემუანი" ამერიკის ბაზარზეც გაიყიდება

სამეგრელოში, მშრალი ხილის მწარმოებელი კომპანია „გემუანი“  წლის ბოლომდე პროდუქციას ამერიკის ბაზარზეც გაიტანს.

როგორც „ბიზნესპარტნიორს“ კომპანიის დამფუძნებელმა ნონა თორდიამ განუცხადა, პირველი პარტია დაახლოებით 1-2 თვეში გაიგზავნება.

„მოლაპარაკებები დასრულებულია, დარჩენილია მხოლოდ ტექნიკური ნაწილის მოგვარება,“ - აცხადებს თორდია.

ამ დროისთვის კომპანიის წარმადობა წელიწადში 24-30 ტონაა.

„გემუანი“ 2020 წლის ივნისიდან შვეიცარიული ტრანსნაციონალური კომპანია Nestle-ს მიმწოდებელია. შესაბამისად, „გემუანი" Nestle-ს რუსეთის ფილიალს ინგრედიენტებით ამარაგებს. თორდია აცხადებს, რომ ქართული კომპანია Nestle-ს საშუალოდ 2 თვეში ერთხელ დაახლოებით 1.5 ტონა პროდუქციას უგზავნის. დაგეგმილია პროდუქციის  AMAZON-ის საშუალებით გაყიდვაც. 

სუბლიმირებული ხილის საწარმო „გემუანი“ 2011 წელს დაარსდა და მის მფლობელობაშია 100 ჰა-მდე საერთო ფართობის მიწის ნაკვეთები, სადაც მდებარეობს ხილ-ბოსტნეულის გადამამუშავებელი საწარმო. უშუალოდ ხილის გადამამუშავაბელი საწარმო 2017 წლიდან ფუნქციონირებს.