გაცოცხლებული უძველესი ნივთები - სანახაობა და სტუმარ-მასპინძლობის სივრცე მეორე სვირში
ზესტაფონის მუნიციპალიტეტის სოფელ მეორე სვირში სტუმარ-მასპინძლობის სივრცეს "საბას" შეხვდებით, რომელიც გამვლელების ყურადღებას განსაკუთრებით ორიგინალური სანახაობებით იქცევს - ქვის ნაკეთობაზე შემდგარი წინა საუკუნის მანქანა, ხელოვნური ჩანჩქერი, ხელნაკეთი დიდი სურა, რესტავრირებული უძველესი ქვევრები. ნივთები, რომელიც სოფელს აღარ სჭირდება, ფაღავეების ოჯახი აცოცხლებს.
როგორც სტუმარ-მასპინძლობის სივრცე "საბას" დამფუძნებელი ყარამან ფაღავა "ბიზნესპარტნიორთან" ამბობს, შენობას, სადაც ხალხს მასპინძლობენ, წლების განმავლობაში საკუთარი სახსრებით აშენებდნენ.
"ფული არ გვქონდა. მამაჩემი სამუშაოდ რომ მიდიოდა და პირობითად 200 ლარს გამოიმუშავებდა, იქიდან ნახევარს ამის მშენებლობას ახარჯავდა. მიზანდასახულია და ბევრი იდეა აქვს. მიზანს კი, ყოველთვის აღწევს. ხელოვანია და ყველაფერს საკუთარი ხელით აკეთებს. ყველა დეტალი მისი შექმნილია. მთავარია ცოდნა, რისი დახმარებითაც იდეას რეალობად აქცევ", - აღნიშნა ყარამან ფაღავამ.
დარბაზი თავიდან სოფლის მოსახლეობას ემსახურებოდა. ნელ-ნელა კი, სტუმრების მიღება სხვადასხვა რეგიონიდან დაიწყეს. რამდენჯერმე ტურისტებიც ჰყავდათ. რაც მთავარია, სტუმრებს ადგილობრივი ნატურალური პროდუქტით უმასპინძლდებიან.
"სოფელში არ იყო ადგილი, სადაც ადამიანს გაუმასპინძლდებოდი. ძირითადად ქორწილებს იხდიან. თბილისიდანაც გვყავდნენ სტუმრები. ჩინეთიდან ჩამოსული დამსვენებლებიც მივიღეთ. აქ ვინც გაივლის ყველა ჩერდება, რადგან ლამაზი სანახაობა შევქმენით. "პაბედას" უღებენ ფოტოებს. სოფელი ნელ-ნელა იტვირთება. ვფიქრობ, ტურისტი აქ შემთხვევით რომ მოხვდეს, ჩვენით აუცილებლად დაინტერესდება. გვინდა, რომ ეს სოფელი მიზიდულობის წერტილი გახდეს", - ამბობს ყარამან ფაღავა.
ფაღავეები საკუთარი მარნის გაკეთებასაც გეგმავენ. ცოლიკოური დარგეს და უახლოეს მომავალში სტუმრებს თავისი ღვინით გაუმასპინძლდებიან. ეზოში აქვთ ხელოვნური ტბა, სადაც თევზს მოაშენებენ.
