ფინანსთა სამინისტრო ქოლცენტრებთან დაკავშირებით საკანონმდებლო ცვლილებებზე მუშაობს
ფინანსთა სამინისტრო ქოლცენტრების საქმიანობასთან დაკავშირებით საკანონმდებლო ცვლილებებზე მუშაობს. ფინანსთა მინისტრის თქმით, ცვლილებები უახლოეს პერიოდში მთავრობას განსახილველად წარედგინება.
ლაშა ხუციშვილმა აღნიშნა, რომ ქვეყანაში ლეგალურად მოქმედებს ბევრი ქოლცენტრი, რომელიც საერთაშორისო, დიდ კომპანიებს ემსახურება. ამავე დროს, გამოიკვეთა ქოლცენტრებიც, რომლებიც არალეგალურ საქმიანობას ეწეოდნენ.
„ქვეყანაში მოქმედებს ბევრი ქოლცენტრი, რომელიც ლეგალურად საქმიანობს და სხვადასხვა საერთაშორისო კომპანიას ემსახურება. მათ შორის არიან Amazon-ი და სხვა კომპანიები, თუმცა, ასევე, გამოიკვეთა ქოლცენტრებიც, რომლებიც შესაძლოა კანონდარღვევით მუშაობდნენ. ამ მიმართულებით არსებული სისხლის სამართლის საქმეების ფარგლებში, ფინანსთა სამინისტროს საგამოძიებო სამსახურში მიმდინარეობს გამოძიება. ამ ეტაპზე, ფინანსთა სამინისტროს საგამოძიებო სამსახური შესულია 46 ქოლცენტრში, სადაც იკვეთება, რომ შესაძლოა ადგილი ჰქონდეს არალეგალურ საქმიანობას. აღნიშნულ ქოლცენტრებს, ბუნებრივია, შეჩერებული აქვთ საქმიანობა. გარდა ამისა, დანიშნულია შესაბამისი ექსპერტიზები და საგადასახადო შემოწმებები“, - განაცხადა ფინანსთა მინისტრმა, ლაშა ხუციშვილმა.
