ელიავას ბაზრობის განვითარების პროექტს კერძო მესაკუთრეები განახორციელებენ
ელიავას ბაზრობის განვითარების პროექტს კერძო მესაკუთრეები განახორციელებენ, - ამის შესახებ კახა კალაძემ თბილისის მთავრობის სხდომაზე განაცხადა.
მისი თქმით, მფლობელებთან შეთანხმება მიღწეულია და ეს იქნება ერთ-ერთი დიდი პროექტი, რომელსაც მუნიციპალიტეტის მიერ შედგენილი გეგმარების საფუძველზე კერძო სექტორი, ამ შემთხვევაში ტერიტორიის მფლობელები განახორციელებენ.
კახა კალაძემ აღნიშნა, რომ ელიავას ბაზრობის ამ ფორმით შენარჩუნება კატეგორიულად მიუღებელია.
"ეს არის მნიშვნელოვანი ეკონომიკური ზონა, თუმცა იქ არსებული მდგომარეობა, ვიზუალი, ინფრასტრუქტურა და უსაფრთხოების ნორმები მნიშვნელოვნად ჩამორჩება დღევანდელ თბილისს. მოლაპარაკებები ყველა მესაკუთრესთან დასრულებულია, მთავარია, პროექტის განვითარებასთან დაკავშირებით, მთავარია, რომ შეთანხმება მოხდა განვითარების კონცეფციასთან დაკავშირებით", - განაცხადა დედაქალაქის მერმა.
მისივე თქმით, გამოცხადდა ტენდერი, გამარჯვებულ კომპანიასთან გაფორმდა გეგმარების თაობაზე ხელშეკრულება და მიმდინარეობს აქტიური მუშაობა. "პროექტი, რომელსაც საბოლოოდ შევიმუშავებთ გაითვალისწინებს როგორც ქალაქის, მესაკუთრეებისა და იქ მომუშავე ადამიანების ინტერესებს", - განაცხადა კახა კალაძემ.
