E-Space ელექტროენერგიის კილოვატებით გაყიდვის უფლებას ითხოვს

ელექტრომობილების დასამუხტი აპარატების ქსელის მფლობელი E-Space ელექტროენერგიის კილოვატებით გაყიდვის უფლებას ითხოვს. კომპანია ამჟამად ელექტრონერგიას წუთობრივად ყიდის, რაც მომხმარებლებში გაურკვევლობას იწვევს.

„ვაკუუმია კანონმდებლობაში. ჩვენ ჯერ არ შეგვიძლია ელექტროენერგიის კოლოვატებით გაყიდვა და წუთობრივად ვყიდით, რაც შეფერხებაა ჩვენთვის. მომხმარებელმა იცის მისი ავტომობილის ბატარეას რამდენი კილოვატი  ელექტროენერგია სჭირდება, მაგრამ ჩვენ მას წუთობრივად ვუკეთებთ ანგარიშსწორებას, რაც დაბნეულობას და გაურკვევლობას იწვევს. გვსურს, სახელმწიფომ მოგვცეს შესაძლებლობა კილოვატებით გავყიდოთ ელექტროენერგია“, -  განაცხადა „ბიზნესპარტნიორში“ სტუმრობისას E-Space-ის აღმასრულებელმა  დირექტორმა ავთანდილ შავიშვილმა.

მისი თქმით, ელექტრომობილების ბაზრის განვითარებისთვის აუცილებელია  სახელმწიფოს ჰქონდეს ავტოპარკის ელექტრომობილებით განახლების გეგმა.

„სახელმწიფომ უნდა დაიწყოს ელექტრომობილების შესყიდვა. ჰქონდეს კონკრეტული გეგმა. მაგალითად,  2022 წელს ახალი შეძენილი ავტომობილების 10% უკვე იყოს ელექტრომობილი. ამ გეგმის არსებობა ძალიან მნიშნველოვნია. სახელმწიფო არის ახალი ავტოპარკის ყველაზე დიდი შემავსებელი, შესაბამისად, მნიშვნელოვან როლს შეასრულებს ამ ბაზრის განვითარებაში“, - მიიჩნევს ავთანდილ შავიშვილი.