Bibbirru-მ Iruli–ს ბრენდით ქალის სამოსის გამოშვება გაურკვეველი ვადით გადადო

ჩანთებისა და ტყავის აქსესუარების მწარმოებელი კომპანია Bibbirru-ს, რომელიც Iruli-ს ბრენდით საქმიანი ქალებისთვის სამოსის ხაზის გამოშვებას სექტემბრისთვის გეგმავდა, COVID-19-ის პანდემიის გამო გეგმები შეეცვალა.

Bibbirru-ს დამფუძნებელი ქრისტინე პახომოვა "ბიზნესპარტნიორთან" განმარტავს, რომ მათი ბრენდში სიახლეების შეტანა უფრო მარტივია, რადგან ცნობადობა საკმაოდ მაღალია, Iruli კი როგორც ახალი ბრენდი გაცილებით ფრთხილ მოქმედებებს და გადაწყვეტილებებს საჭიროებს.

„სექტემბერში დაგეგმილი ჩაშვება, გაურკვეველი ვადით გადაგვედო. პანდემია და მის მიერ შექმნილი არასტაბილური გარემო ბაზარზე, დიდ წინაღობას გვიქმნის ახალ საქმიანობაში. წარმოდგენა არ გვაქვს, როდის შევძლებთ გაბედულად ბაზარზე შესვლას და რამდენად რელევანტური იქნება, მზა ხაზი სეზონთან. Iruli-ს ჩაშვება ნიშნავს მნიშვნელოვან პასუხისმგებლობას, როგორც პოტენციურ მომხმარებლებთან, ასევე დასაქმებულებთან. ამიტომ ჯერჯერობით არ გვაქვს პასუხი, დაველოდებით სიტუაციის გაუმჯობესებას", - აღნიშნავს ქრისტინე პახომოვა.

Bibbirru უკვე ერთი წელია ჩანთებსა და ტყავის აქსესუარებს აწარმოებს. ახალი ბრენდის განვითარებაში კი კომპანია 15 000 ლარის ინვესტიციას გეგმავდა.