"ბადიში" შემოდგომიდან აჯიკას და საწებელს პორციული შეფუთვითაც გამოუშვებს

კომპანია „ბადიში“  შემოდგომიდან (ნოემბერი) აჯიკას და საწებელს პორციული შეფუთვითაც გამოუშვებს.

კომპანიის დამფუძნებელი გიორგი ჩხაიძე „ბიზნესპარტნიორთან“ აცხადებს, რომ ამისთვის კომპანიამ საქართველოს ინოვაციების და ტექნოლოგიების სააგენტოსგან( GITA )  გრანტიც მიიღო.

მისი ინფორმაციით, დაგეგმილია ახალი დანადგარის შეძენა, რომელიც სამომავლოდ სხვადასხვა სახის პორციული შეფუთით პროდუქტის წარმოების შესაძლებლობას იძლევა. დაგეგმილია აჯიკის და საწებლების  30-50 გრამიანი შეფუთვით წარმოება.

მისი განცხადებით, ამჟამად კომპანია  აღნიშნულ პროდუქტებს მინის ქილებში უკვე აწარმოებს.

„როგორც გურიაში ეტყვიან, ეს იქნება „ერთი ამოწება“ პროდუქტი, მცირე ულუფა, რომელიც საწყის ეტაპზე ადგილობრივი ბაზარზე, შემდეგ კი ექსპორტზეც გაიყიდება. მოლაპარაკებები გვაქვს სწრაფი კვების ობიექტებთანაც. კომპანიის მიზანია გურული გასტრონომიის პოპულარიზაცია და გურული გემოების საზოგადოებისთვის შეთავაზება. მისი წარმოება ხდება ოჯახურ პირობებში, მთის მწვანილებით და ეკოლოგიურად უსაფრთხო პროდუქციისგან ,“აცხადებს ჩხაიძე.

მისივე განმარტებით,  „ბადიში“ პირველ  წელიწადს  100 000  პორციული პაკეტის წარმოებას გეგმავს.

ჩხაიძის ინფორმაცით, 2020 წლიდან დღემდე „ბადიშის“ შეძენა ონლაინ იყო შესაძლებელი. კომპანია რამდენიმე სახეობის პროდუქტს (მათ შორის, 2 აჯიკა და რამდნეიმე სახეობა  საწებელი)  ოზურგეთში, ოჯახის პირობებში აწარმოებს, დაფასოებას კი რუსთავში ახდენს.

 „ბადიშის“ დამფუძნებელი განმარტავს, რომ კომპანია აქტიურად აგრძელებს ფინანსების მოძიების პროცესსს, რის შემდეგადაც ოზურგეთში საწარმოს მშენებლობას დაიწყებს.

კომპანია „ბადიში“, ბაზარზე 2020 წლიდააა და კერძებისთვის ქართულ გემოებს აწარმოებს. მათ შორისაა, აჯიკა, ტყემალი და საწებელი.

შეგახსენებთ, „ბადიში“  "პირველი არხის სატელევიზიო შოუ შარქ თენქ საქართველოს" მონაწილეცაა.