ავტომფლობელთა პასუხისმგებლობის სავალდებულო დაზღვევა შესაძლოა, ეტაპობრივად ამოქმედდეს
სადაზღვევო სექტორი იმედოვნებს, რომ მესამე პირის სავალდებულო ავტოდაზღვევის შესახებ კანონი წელს მაინც შევა ძალაში.
როგორც სადაზღვევო ასოციაციის ხელმძღვანელმა „ბიზნესპარტნიორს“ განუცხადა, შესაძლოა კანონმდებლობის მიღების შემდეგ, ის ეტაპობრივად ამოქმედდეს.
„ორი წელია ეს კანონპროექტი პარლამენტშია და სხვადასხვა მიზეზით მისი მიღება ვერ მოხერხდა. საწინააღმდეგო არგუმენტებს დაემატა კოვიდი და ალბათ პანდემია ყველაზე ობიექტური მიზეზი იყო სხვა მიზეზებს შორის, რის გამოც კანონის მიღება გადავადდა. თუმცა იმედია, მესამე პირის სავალდებულო ავტოდაზღვევის კანონმდებლობის მიღებას პარლამენტი წელს მაინც შეძლებს.
სამწუხაროა, რომ მთავრობა და კანონმდებლები თვლიან, რომ მესამე პირის სავალდებულო ავტოდაზღვევის შესახებ კანონის მიღება არაპოპულარული ნაბიჯია. ვფიქრობ, ეს არის რეალური მიზეზი, რის გამოც ამ დრომდე ის არ ამოქმედდა. პოლიტიკური თემები წელსაც დომინირებს და იმედი გვაქვს, ჩვენი არგუმენტაციითა და ევროკავშირის ძალისხმევით მესამე პირის სავალდებულო ავტოდაზღვევის შესახებ კანონი წელს შევა ძალაში,“- განაცხადა დევი ხეჩინაშვილმა.
