ავეჯის სექტორის ნაწილი ქონების გადასახადის გაუქმებას ითხოვს

ავეჯის ინდუსტრია 2022 წელს აჯამებს. გასულ წელს, ავეჯის მწარმოებელ ქართულ კომპანიებს გაყიდების მაჩვენებლი, დაახლოებით, 20%-ით გაეზარდათ. მზარდია ქვეყანაში ავეჯის მწარმოებელი კომპანიების რიცხვი და წარმოებული პროდუქციის მოცულობაც. მაგალითისთვის, „გალტ ენდ თაგარტის“ მონაცემებით, 2017-2021 წლებში, ავეჯის სექტორში ადგილობრივი წარმოების წილი 22%-დან 27%-მდე გაიზარდა. თუმცა, დარგში ამ დრომდე  რიგ პრობლემებს ებრძვიან.

როგორც „ბიზნესპარტნიორთან“  "ქართული ავეჯის კლასტერის" გამგეობის თავმჯდომარე ბესიკ ვერძეულმა განუცხადა,ინდუსტრიას არაერთი პრობლემა აწუხებს, მათ შორისაა ემიგრაციაში წასული კადრები, ადგილობრივი წარმოების მასალების, ასევე თანამედროვე დანადგარების დეფიციტი და ფინანსებზე ხელმისაწვდომობის სირთულე.

„ჩვენი სექტორი მგრძნობიარე აღმოჩნდა როგორც პანდემიის, ისე გეოპოლიტიკური მოვლენების მიმართაც. გაძვირებული მასალების და ლოგისტიკური ხარჯების გამო, 2022 წლის დასაწყისიდან დღემდე, ავეჯზე ფასები 20-დან 25 პროცენტამდე გაიზარდა. თუმცა, ამის მიუხედავად, როგორც იმპორტირებულ, ისე ადგილობრივ ავეჯზე მოთხოვნა მაინც მზარდია“, - აცხადებს ბესიკ ვერძეული.

მსგავსი მოსაზრება აქვს ავეჯის სახლი „კონსტანტინის“ დამფუძნებელ ნიკა წიფურიასაც. ის ამბობს, რომ მიუხედავად ბოლო წლებში არსებული გამოწვევებისა, ხალხი ავეჯს მაინც ყიდულობს.

„ქვეყანაში აქტიურად მიდის მშენებლობები, შენდება ახალი საცხოვრებელი კომპლექსები, სასტუმროები, რესტორნები, სადაც საჭიროა ავეჯი და ამ ფაქტორებიდან გამომდინარე, ჩვენი სექტორი გაყიდვებში ზრდას ინარჩუნებს“,- განმარტავს ნიკა წიფურია.

სექტორის წარმომადგნელები, დარგის პოტენციალზეც საუბრობენ და აღნიშნავენ, რომ თუ სახელმწიფოს მხრიდან იქნება სათანადო ხელშეწყობა, როგორც მაგალითად ღვინის სექტორის, ტურიზმის სექტორის მიმართ იყო - განვითარებას და ქვეყნის ეკონომიკაში მნიშვნელოვანი წვლილის შეტანას ავეჯის სექტორიც შეძლებს.

„ძალიან კარგი ხელშეწყობა ჰქონდა თავის დროზე ღვინის სექტორს, რამაც ეს დარგი განავითარა. არანაკლები პოტენცილი აქვს ავეჯს. მით უფრო, რომ საქართველოს დიდი ტრადიცია აქვს დურგლის პროფესიის. ამიტომ,  ეს სექტორი მეტ დახმარებას და ყურადღებას ნამდვილად იმსახურებს“, - აცხადებს  ქართული ავეჯის კლასტერის გამგეობის თავმჯდომარე ბესიკ ვერძეული.

მისივე თქმით, ავეჯის მწარმოებლები სახელმწიფოს მხრიდან გაბედული ნაბიჯების გადადგამს ითხოვენ, მათ შორის: ქონების გადასახადის გაუქმებას, ავეჯის გამოფენების ორგანიზებას, პროფესიული სასწავლებლების გახსნასა და  დარგის ცნობადობის გაზრდისთვის უფრო მეტ აქტივობას.