არდი: კოვიდ დაზღვევა ტურისტებისთვის სავალდებულო უნდა იყოს
„ტურისტებისთვის კოვიდ დაზღვევის პირობები, სავარაუდოდ, უცხოელი სტუდენტების დაზღვევის ანალოგიური იქნება,“ - ამის შესახებ „ბიზნესპარტნიორს“ სადაზღვევო კომპანია „არდის“ აღმასრულებელმა დირექტორმა განუცხადა.
მისივე განმარტებით, საბოლოო გადაწყვეტილება თუ როდიდან და რა ფორმით ამოქმედდება ტურისტებისთვის კოვიდ დაზღვევა მიღებული არ არის.
„ერთადერთი, რაც მნიშვნელოვანია კომპანიებისთვის არის ის, რომ კოვიდ დაზღვევა ტურისტებისთვის იყოს სავალდებულო. თუ სავალდებულო არ იქნება, უდიდესი ნაწილი ცხადია არ იყიდის. რაც საფრთხეს უქმნის ქვეყნის ეპიდსიტუაციას. ამ ნაწილში აღსრულებასაც აქვს უდიდესი მნიშვნელობა. თუ არ გაკონტროლდა აქვს თუ არა დაზღვევა ტურისტს, დაზღვევა ექნებათ მხოლოდ ქაღალდზე და საჭიროების შემთხვევაში, არ იმუშავებს", - განაცხადა მიხეილ ჯაფარიძემ.
მისივე განმარტებით, ტურისტებისთვის კოვიდ დაზღვევის ფასების ზედა ზღვარი ამ ეტაპზე განსაზღვრული არ არის.
„თუმცა თუ გამოვალთ იქიდან, რომ კოვიდ დაზღვევაც უცხოელი სტუდენტების დაზღვევის ანალოგიური იქნება, ზედა ზღვარი ამ შემთხვევაში განსაზღვრულია 50 ლარით. 40-45 ლარიანი სადაზღვევო პაკეტებიც არის ბაზარზე. ტურისტებისთვის კოვიდ დაზღვევის ფასის განსაზღვრისას ასევე მნიშვნელოვანი ფაქტორი იქნება ვიცოდეთ თუ რამდენ ტურისტს ელის ქვეყანა. სწორედ აქედან გამომდინარე ჩამოყალიბდება ფასები,“ - განმარტა მიხეილ ჯაფარიძემ.
