არასტანდარტულ ვაშლს საწარმოები 10 სექტემბრიდან ჩაიბარებენ

ფერმერები, სახელმწიფო პროგრამაში ჩართულ ხილის გადამმუშავებელ საწარმოებში, არასტანდარტული ვაშლის ჩაბარებას, არანაკლებ 22 თეთრად, 10 სექტემბრიდან 15 დეკემბრამდე შეძლებენ.

ვაშლის ჩაბარების მიზნით, გორში საკოორდინაციო შტაბი უკვე მოქმედებს.

1 კგ არასტანდარტული ვაშლის შესყიდვისას, კომპანიები სახელმწიფო სუბსიდიას 10 თეთრს მიიღებენ თუ მეხილეობის სფეროში დასაქმებული ფიზიკური პირებისგან 1 კგ არასტანდარტულ ვაშლს, მინიმუმ 22 თეთრად შეისყიდიან.

გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და სოფლის განვითარების სააგენტოს დირექტორი ილია თამარაშვილი შიდა ქართლის რეგიონში მოქმედი ხილის გადამმუშავებელი საწარმოების წარმომადგენლებსა და საკოორდინაციო შტაბის წევრებს ვირტუალურ ფორმატში შეხვდნენ და ვაშლის ჩაბარების დეტალები განიხილეს. 

აღსანიშნავია, რომ „შეღავათიანი აგროკრედიტის“ პროექტის ფარგლებში, არასტანდარტული ვაშლის შემსყიდველ საწარმოებზე კრედიტი საბრუნავი საშუალებებისთვის, გაიცემა მხოლოდ არასტანდარტული ვაშლის გადამუშავების მიზნობრიობით.