ანაკლიის კონსორციუმის იურისტი: ახალი ინვესტორის მოძებნის პროცესი უმტკივნეულოდ არ ჩაივლის
„ნამდვილად არ მოველით, რომ ახალი ინვესტორის მოძებნის პროცესი უმტკივნეულოდ ჩაივლის,“ - ამის შესახებ „ბიზნესპარტნიორს“ ანაკლიის განვითარების კონსორციუმის უფლებადამცველმა, BLC-ის მმართველმა პარტნიორმა განუცხადა.
ქეთი ქვარცხავას განმარტებით, ანაკლიის პორტი თავისი ნეგატიური წარსულით, როგორც აქტივი არის ტოქსიკური.
„ანაკლიის პორტს, როგორც აქტივს უკვე აქვს თავისი ისტორია. ამ ისტორიის მანძილზე უკვე გამოჩნდა ათეული ეპიზოდი, როდესაც მთავრობამ გამოავლინა ნეგატიური დამოკიდებულება პროექტის მიმართ. საკუთარი მოქმედებებით თუ პროექტის მიმართ უნდობლობით. მათ ეჭვის ქვეშ დააყენეს როგორც პროექტის ეკონომიკური სარგებელი ისე ინვესტორის მოძიების შესაძლებლობა და ასე შემდეგ. გარდა ამისა, ყველას მოეხსენება, რომ ანაკლიის პორტთან დაკავშირებით ორი საარბიტრაჟო დავა მიმდინარეობს და თავად აქტივი არის ტოქსიკური. მას აქვს ნეგატიური ისტორია. ასე რომ არ მოველით, რომ ახალი ინვესტორის მოძებნის პროცესი უმტკივნეულოდ ჩაივლის,“-განაცხადა ქეთი ქვარცხავამ.
შეგახსენებთ, რომ პრემიერის განცხადებით, მთავრობა ანაკლიის ღრმაწყლოვანი პორტის მშენებლობისთვის ინვესტორის მოძიების პროცესს უახლოეს მომავალში დაიწყებს.
პრემიერ-მინისტრის განმარტებით, ეკონომიკის სამინისტრო უახლოეს მომავალში ტენდერის გამოცხადების სამუშაოებს განახორციელებს.
