“5 ქვეყანაში გაგვქონდა ღვინო, პანდემიის გამო 1 ბოთლიც არ გაგვიყიდია“ – “შალოშვილის მარანი“

პანდემიის პერიოდში, უცხოელი ტურისტების ნაკლებობამ ბევრი ბიზნესი დააზარალა. ერთ-ერთი ასეთია კახეთში, სოფელ შილდაში მდებარე „შალოშვილის მარანი“, სადაც მარნისა და სადეგუსტაციო სივრცის გარდა, 22 ნომრიანი სასტუმრო, აუზი და გასართობი სივრცეებია მოწყობილი.

„შალოშვილის მარანის“ დამფუძნებელი ალექსი შალოშვილი აღნიშნავს, რომ სასტუმრო ფაქტობრივად გაჩერებულია და კვირაში მხოლოდ 1–2 ნომერი იტვირთება. ამის გამო  მას პერსონალისთვის ხელფასის გადახდა საკუთარი ჯიბიდან უწევს.

„სესხები წლის ბოლომდეა დასაფარი, ჩვენ კი ვიზიტორები ფაქტობრივად არ გვყავს. საოცარი სადეგუსტაციო სივრცე მოვაწყვეთ, ვცდილობდით ყველაფერი საუკეთესო ყოფილიყო, უფრო მეტი სერვისი შეგვეთავაზებინა დამსვენებლისთვის, მაგრამ ჩვენი მოლოდინები არ გამართლდა“, - აცხადებს  ალექსი შალოშვილი.

მარანში ძირითადად ოთხი სახეობის ღვინოს აყენებენ, ესენია: რქაწითელი, საფერავი, მწვანე და ქისი. როგორც შალოშვილი აღნიშნავს, პანდემია ღვინის ექსპორტზეც უარყოფითად აისახა.

„16 ჰექტარ ვენახს ვფლობთ და ღვინოს ჩვენსავე მარანში ვაყენებთ. გვაქვს ქვევრის ღვინო, ასევე ვასხამთ ბოთლებში და გაგვაქვს რამდენიმე ქვეყანაში, გერმანიაში, პოლონეთში, რუსეთში და სხვა. თუმცა, პანდემიის გამო იანვარში გასაგზავნი ტვირთი ჯერ კიდევ არ გაგვიშვია. ერთადერთი იმედი ახლა კარგი მოსავალია, რადგან როდის დავუბრუნდებით ჩვეულ რიტმს და როდის იმუშავებს სასტუმრო სრული დატვირთვით არ ვიცით“, – აღნიშნავს ალექსი  შალოშვილი.