₾20 მლნ-იანი ინვესტიციით ქუთაისში ახალი სავაჭრო ცენტრი "ვესთ ფოინთი" იხსნება

20 მლნ-იანი ინვესტიციით ქუთაისში ახალი სავაჭრო ცენტრი „ვესთ ფოინთი“ გაიხსნება.

პროექტს კომპანია „სენტა“ პარტნიორებთან ერთად ახორციელებს. როგორც „ვესთ ფოინთის“ თანადამფუძნებელმა ზაალ იაკობიძემ „ბიზნესპარტნიორს“ განუცხადა, სავაჭრო ცენტრი 20 000 კვადრატულ მეტრ ფართობს მოიცავს.

„აქედან 10 ათასი შენობას უჭირავს, დანარჩენი კი პარკინგისთვის არის განსაზღვრული. „ვესთ ფოინთში“ განთავსდება სხვადასხვა ბრენდული მაღაზია, გასართობი ცენტრი, კვების ობიექტი, „კარფური“, აფთიაქები და სხვა. ჩვენს პარტნიორებთან ერთად, პროექტში უკვე განვახორციელეთ დაახლოებით 20 მლნ ლარის ინვესტიცია, თუმცა ეს საწყისი ეტაპია და ინვესტიციის მოცულობა ეტაპობრივად გაიზრდება. ვგეგმავთ, რომ „ვესთ ფოინთის“ სავაჭრო ცენტრები სხვა რეგიონებშიც განვავითაროთ, თუმცა პირველ ლოკაციად იმერეთი შეირჩა“, - აღნიშნა ზაალ იაკობიძემ.

მისივე განმარტებით, „ვესთ ფოინთის“ სავაჭრო ცენტრი ოფიციალურად 25 აგვისტოს გაიხსნება.