₾1 მლნ-ად შეფასებულ ლოკოკინების ფერმას მყიდველი არ გამოუჩნდა

სამეგრელოში, აბაშაში 3 ჰექტარზე გაშენებული ლოკოკინების ფერმა ამ დრომდე ვერ გაიყიდა. ბიზნესი 1 მილიონ ლარადაა შეფასებული.

როგორც „ბიზნესპარტნიორს“ ფერმის თანამფლობელმა  სოსო კაჭარავამ განუცხადა, ინტერესი არსებობს რამდენიმე უცხოელი ინვესტორისგან, ჩამოსულებიც იყვნენ ადგილზე, თუმცა, ამ დრომდე გარიგება ვერ შედგა.

„ჩამოსულები იყვნენ, ნახეს და წავიდნენ. პასუხის მოლოდინში ვართ. ვნახოთ რა იქნება,“ - აცხადებს კაჭარავა.  

შეგახსენებთ, ლოკოკინების ფერმა  2021 წლის ოქტომბრიდან იყიდება. მიზეზი რამდენიმეა, მათ შორისაა, სფეროში არასაკმარისი განათლება/გამოცდილება და ფერმის მფლობელი კომპანია „აისბერგის“ ქოლგის ქვეშ არსებული სხვადასხვა ბიზნესი, რის გამოც დამფუძნებლებს ლოკოკინების წარმოების შესაძლებლობა აღარ აქვთ.

ფერმაში არის 150 ტონა წყლის საცავი ცისტერნები, 2 არტერიული ჭა, ფერმამდე მიყვანილია გზა, ტერიტორიაზე  ლოკოკინების ჩასასმელი სივრცე (104 სექცია), ხის პალეტები 7420 ცალი, მინდვრის სარწყავი სისტემა, მოწყობილია სივრცე ლოკოკინის გასაშრობად, მოწესრიგებულია მთლიანი ეზოს განათება, ფერმაში არსებობს სრული ინვენტარიზაცია (ხელსაწყოები), წისქვილი და ასე შემდეგ.