"ქვეყანაში კოოპერატივები ძირითადად მეცხოველეობასა და მეფუტკრეობას მისდევენ"- კონსტანტინე ხუცაიძე
„საქართველოში სასოფლო-სამეურნეო კოოპერატივები რთულად ფუნქციონირებენ“- ამის შესახებ გადაცემა „ბიზნესი რუსთავი 2-ს“ სოფლის განვითარების სააგენტოს კოოპერატივების განვითარების დეპარტამენტის უფროსმა, კონსტანტინე ხუცაიძემ განუცხადა.
კოოპერატივი დამოუკიდებელი ორგანიზაციაა, რომელიც ერთობლივი საქმიანობის განხორციელების მიზნით შეკრებილი ადამიანებისგან ყალიბდება, როგორიცაა სასოფლო-სამეურნეო პროდუქციის წარმოება, ნედლეულის მოპოვება და სხვა.
როგორც კოოპერატივების განვითარების დეპარტამენტის უფროსი აცხადებს, კოოპერატივების არაერთი შემაფერხებელი ფაქტორი არსებობს, მათ შორისაა ნდობისა და განათლების ფაქტორი.
„საერთაშორისო ორგანიზაცია „კოოპერატივების საერთაშორისო ალიანსმა“ რეკომენდაციის სახით 7 პრინციპი დაადგინა, რასაც უნდა ეყრდნობოდეს კოოპერატივი, ესაა ღია და გამჭვირვალე წევრობა, ავტონომია და დამოუკიდებლობა, ეკონომიკური მონაწილეობა წევრთა კოოპერატიულ საქმიანობაში, წევრთა დემოკრატიული კონტროლი, თემზე ზრუნვა, ერთმანეთზე ზრუნვა და ა.შ.“- აცხადებს ხუცაიძე.
აღსანიშნავია, რომ კოოპერატივები ძირითადად მემცენარეობა-მეცხოველეობას, თხილის წარმოებას მისდევენ, თუმცა დაწინაურებულია მეცხოველეობის მიმართულება, ანუ მესაქონლეობა და ასევე მეფუტკრეობა.
ყველა პროგრამაში, რომელიც სოფლის განვითარების საააგენტოს ეგიდით ხორციელდება, სასოფლო-სამეურნეო კოოპერატივები შეღავათებით სარგებლობენ. ამას გარდა, სააგენტო ახორცირელებს სპეციალურ პროგრამას, სადაც მხოლოდ ოფიციალური სტატუსის მქონე სასოფლო სამეურნეო კოოპერატივებს შეუძლიათ მონაწილეობის მიღება.
ცნობისთვის, ამ დროისათვის რეგისტრირებულია 650 სასოფლო-სამეურნეო კოოპერატივი, რომელიც 7 ათასამდე მცირე ფერმერს აერთიანებს.
