ასურეთში იშვიათი ქართული ხორბლის ჯიშების მოსავალს იღებენ

ასურეთის ენდემური და ადგილობრივი ხორბლის ჯიშების სადემონსტრაციო-სანერგე მეურნეობაში იშვიათი ქართული ხორბლის ჯიშებია დაცული. ასურეთში დიკასა და შავფხას მოსავლის აღების პროცესი უკვე დაწყებულია.

„ქართული ენდემური ხორბლის ჯიშების აღდგენისა და წარმოების ხელშეწყობა სამინისტროს სტრატეგიის ნაწილია. ჩვენ სელექციის და ახალი ჯიშების წარმოების უზარმაზარი პოტენციალი გვაქვს“, - განაცხადა მინისტრის მოადგილემ ნინო თანდილაშვილმა.

UNDP-ის ხელმძღვანელი ლუიზა ვინტონი ენდემური და ადგილობრივი ჯიშების აღდგენის მნიშნელობაზე აცხადებს, რამდენადაც ისინი კლიმატის ცვლილების მიმართ მედეგია და გამორჩეულია გემოვნური თვისებებით.

დიკასა და შავფხას აღდგენა „ქართული ხორბლის მწარმოებელთა გაერთიანების“ ინიციატივითა და საქართველოში გაეროს განვითარების პროგრამის (UNDP) და გლობალური გარემოსდაცვითი ფონდის (GEF) დაფინანსებით განხორციელდა.

გარემოს დაცვისა და სოფლის მეურნეობის სამინისტროს, გაეროს განვითარების პროგრამისა (UNDP) და გლობალური გარემოსდაცვითი ფონდის (GEF) ხელშეწყობით, საქართველოს სხვადასხვა რეგიონში მცირე ადგილობრივი პროექტები ხორციელდება, რომლებიც მოსახლეობისთვის მნიშვნელოვანი გარემოსდაცვითი საკითხების მოგვარებას ემსახურება.

GEF-ის მცირე გრანტების პროგრამა საქართველოში 2012 წლიდან მოქმედებს. პროგრამის ფარგლებში, 70-ზე მეტი ადგილობრივი გარემოსდაცვითი პროექტი განხორციელდა, ხოლო გაცემული დაფინანსების ოდენობამ 1.6 მილიონ აშშ დოლარს გადააჭარბა.