ვაქცინების შერჩევის შეცვლილი კრიტერიუმები - დადგენილების დეტალები
საქართველოში ვაქცინების შერჩევის კრიტერიუმები იცვლება. ფართოვდება ჩამონათვალი, რომელიც ქვეყანაში კოვიდვაქცინების გამოყენების უფლებას იძლევა.
ცვლილება შევიდა “იზოლაციისა და კარანტინის წესების დამტკიცების შესახებ“ მთავრობის დადგენილებაში, რომლის თანახმადაც საქართველოში კოვიდვაქცინის დანერგვის ეროვნული გეგმის მიზნებისთვის გამოიყენება ფარმაცევტული პროდუქტი, რომელსაც აქვს ჯანმრთელობის მსოფლიო ორგანიზაციის ან მის მიერ აღიარებული ნებისმიერი მკაცრი მარეგულირებელი ორგანოს მიერ მინიჭებული გამოყენების (მათ შორის, გადაუდებელი გამოყენების) ავტორიზაცია ან პრეკვალიფიკაცია; ან რომელზეც ჯანმოშიც წარდგენილია გამოყენების (მათ შორის, გადაუდებელი გამოყენების) ავტორიზაციის ან პრეკვალიფიკაციის განაცხადი, მისი დოსიე განხილვის სტადიაშია და ამასთან, უკვე მიღებული აქვს ჯანმოს იმუნიზაციის ექსპერტების სტრატეგიულ მრჩეველთა ჯგუფის დადებითი დასკვნა, ასევე აქვს არანაკლებ სხვა 20 ქვეყნის ეროვნული მარეგულირებელი ორგანოს მიერ მინიჭებული გამოყენების (მათ შორის, გადაუდებელი გამოყენების) ავტორიზაცია და ამავდროულად, აღნიშნული ვაქცინით მსოფლიო მასშტაბით აცრილია ქვეყნის სამიზნე პოპულაციაზე 10-ჯერ მეტი პირი.
2021 წლის დასაწყისში შემუშავებული ვაქცინაციის დანერგვის ეროვნული გეგმის თანახმად, საქართველოში კოვიდვაქცინა გამოყენებისთვის დაიშვებოდა მას შემდეგ, რაც ის მიიღებდა ჯანმო-ს აღიარებას შეყვანილი იქნებოდა ან გადაუდებელი გამოყენების სიაში ან გავლილი ექნებოდა პრე-კვალიფიკაცია. ან, მას უნდა ჰქონოდა გადაუდებელი გამოყენების ნებართვა ან ეროვნული რეგისტრაცია მაღალი სანდოობის მქონე ეროვნული მარეგულირებლისგან (სულ 37 ქვეყნის მარეგულირებელი).
ამასთან, სახელმწიფომ ვაქცინაციის რისკები დააზღვია. კანონის თანახმად, კორონავირუსის საწინააღმდეგო ვაქცინის საქართველოში შემოტანის შემდეგ, აცრების გვერდითი მოვლენების ან გართულებების გამოვლენის შემთხვევაში სახელწმიფო უზრუნველყოფს მოსახლეობის უფასო სამედიცინო მომსახურებას და რეაბილიტაციას, გარდა იმ შემთხვევებისა, როდესაც გვერდითი მოვლენები გამოწვეულია სამედიცინო პერსონალის ან დაწესებულების მიერ დაშვებული შეცდომით.
