როგორ მოწმდება კლინიკები და ფარმაცევტული ობიექტები - რეგულირების სააგენტოს მანდატი
როგორ ამოწმებს კლინიკებსა და ფარმაცევტულ ობიექტებს რეგულირების სააგენტო, რომლის მანდატის გაფართოება უკვე ჯანდაცვის მინისტრმა დაანონსა - ამ საკითხთან დაკავშირებით “ბიზნესპარტნიორი“ ფარმაცევტული და სამედიცინო საქმიანობის რეგულირების სააგენტოს ხელმძღვანელს ზაალ კაპანაძეს ესაუბრა.
მისი თქმით, კლინიკებს სანებართვო და სალიცენზიო მოთხოვნები აქვთ, რომელიც ბევრ კომპონენტს მოიცავს, მათ შორის ინფრასტრუქტურულ, ხარისხობრივ შემადგენელს.
“სანებართვო მოთხოვნების შემოწმებისას ჯგუფი მიდის კლინიკაში და დეტალურად გადის ყველა იმ მოთხოვნას, რომელიც კლინიკის საქმიანობისთვის აუცილებელია. ამის პარალელურად ხდება კონტროლი, რამდენად დაცულია ინფექციის გავრცელების წყარო, რაც დღევანდელ პირობებში ძალიან მნიშვნელოვანია. განსაკუთრებით პანდემიის დროს რეგულირების სააგენტომ აქტიურად იმუშავა ამ მიმართულებით. ჩვენ გვქონდა ჰიბრიდული ტიპის კლინიკები, სადაც კოვიდპაციენტების პარალელურად, სხვადასხვა დაავადების მქონე პაციენტებიც მკურნალობენ, მიმდინარეობდა კონტროლი, სივრცობრივი კვეთები რომ არ ყოფილიყო,“ - აღნიშნა ზაალ კაპანაძემ.
მისი განცხადებით, სანებართვო და სალიცენზიო პირობების შემოწმების გარდა, რეგულირების სააგენტო პაციენტების მიმართვის საფუძველზეც რეაგირებს.
“თუ პაციენტის მიმართ სამედიცინო მომსახურების კუთხით რაიმე პრობლემა იჩენს ხოლმე თავს, ამ შემთხვევაში რეგულირების სააგენტო კონკრეტულ საქმეებს განიხილავს - პაციენტის მიმართ გაწეული სამედიცინო მომსახურება რამდენად იყო ჩამჯდარი იმ საერთო საექიმო საქმიანობის, იმ პროტოკოლით გათვალისწინებულ მოთხოვნაში, რომელიც უნდა ჩატარებულიყო. ეს უშუალოდ კლინიკის შემოწმებას არ მოიცავს, თუმცა ერთგვარი ინდიკატორია კლინიკის ხარისხობრივი შემადგენელის“, - განაცხადა ზაალ კაპანაძემ.
რაც შეეხება ფარმაცევტულ ობიექტებს, ზაალ კაპანაძის განცხადებით, შემოწმება წამლის ვადიანობას, მის უსაფრთხოდ განთავსებას ეხება.
“როდესაც წამალს ბაზარზე დაუშვებ, მას სჭირდება ტრანსპორტირება, შემდეგ უკვე მისი განთავსება ხდება სააფთიაქო ქსელში, რეალიზაციის მიზნით. მას აქვს თავისი პირობები. საკვების მსგავსად, წამალსაც აქვს ვადები, შენახვის და დასაწყობების პირობები. სააგენტოს თანამშრომლები შედიან, ნახულობენ რამდენად დაცულია აფთიაქის მოწყობისათვის საჭირო პირობები, ის მედიკამენტოზური საშუალებები, რომელიც ინახება აფთიაქში, რამდენად აკმაყოფილებენ შენახვის პირობებს და მოთხოვნებს, ასევე რამდენად დაცულია ვადიანობის ნაწილი, რაც ძალიან მნიშვნელოვანია. არ შეიძლება მოქალაქეს მიეწოდოს არაშესაბამის პირობებში დაცული მედიკამენტი, ან იყოს ვადაგასული“ ,- განაცხადა ზაალ კაპანაძემ.
ინფორმაციისთვის, ჯანდაცვის სამინისტრო სამედიცინო და ფარმაცევტულ სექტორზე კონტროლის გამკაცრებას აპირებს. გაფართოვდება რეგულირების სააგენტოს მანდატი, რომელიც კლინიკებსა და ფარმაცევტულ ობიექტებს ინტენსიურად შეამოწმებს.
