მოკვლისას ცხოველის ტანჯვისა და სტრესისგან დაცვის მიზნით ახალი წესი დამტკიცდა
ცხოველის მოკვლის დროს თავიდან უნდა იქნეს აცილებული ცხოველის ყოველგვარი ტკივილი, სტრესი ან ტანჯვა.
ამისთვის კი ბიზნესოპერატორმა აუცილებელი ზომები უნდა მიიღოს, რათა დარწმუნდეს, რომ ცხოველი არ ავლენს ტკივილის ან შიშის ნიშნებს ან არანორმალურ ქცევას, არ იტანჯება საკვებისა და წყლის ხანგრძლივი მიუწვდომლობის გამო, ცხოველებს არ აქვთ სხვა ცხოველებთან კონტაქტი, რაც შესაძლოა მათი კეთილდღეობისათვის ზიანის მომტანი იყოს.
ამის შესახებ „მოკვლისას ცხოველთა დაცვის წესშია“ ნათქვამი, რომელიც საქართველოს მთავრობის დადგენილებით, სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის 75-ე მუხლის მე-2 ნაწილის შესაბამისად დამტკიცდა.
ეს წესი არ გამოიყენება იმ შემთხვევაში, თუ ცხოველების მოკვლა ხდება სურსათის ეროვნული სააგენტოს ზედამხედველობით, სამეცნიერო ექსპერიმენტის დროს, ნადირობის ან რეკრეაციული თევზაობის დროს, პირადი მოხმარებისათვის, მფლობელის მიერ სასაკლაოს გარეთ მოკლულ ფრინველზე, ბოცვერსა და კურდღელზე. ამ წესის მოთხოვნების შესრულებაზე კონტროლს სურსათის ეროვნული სააგენტო ახორციელებს.
დოკუმენტის თანახმად, მოკვლისა და მასთან დაკავშირებული სამუშაოებისათვის გამოყენებული სათავსი უნდა იყოს დაგეგმარებული, აშენებული, მოვლილი და ფუნქციონირებდეს ისე, რომ მთელი წლის განმავლობაში სათავსში დაგეგმილი საქმიანობის პირობებში უზრუნველყოფილი იყოს ზემოთ დასახელებული მოთხოვნების შესრულება.
ცალკეა გამოყოფილი მუხლი გაბრუების მეთოდების შესახებ, რომელშიც აღნიშნულია, რომ ცხოველთა მოკვლა დასაშვებია მხოლოდ გაბრუების შემდეგ. გაბრუების მეთოდებში შედის თავში მყარი და ზუსტი დარტყმის განხორციელება,
ელექტროგაბრუება, კისრის ღრძობა/ დისლოკაცია (ცერებრალური იშემიის პროვოცირების მიზნით, კისრის ხელით ან მექანიკური გაჭიმვა და შემობრუნება.), წყლის ელექტროაბაზანა, გაბრუება გაზის ნარევით, მომაკვდინებელი ინექცია.
დოკუმენტის თანახმად, გონებისა და მგრძნობელობის დაკარგვა ცხოველის სიკვდილის დადგომამდე უნდა შენარჩუნდეს. ხოლო თუ შესაბამისი მეთოდები არ გამოიწვევს მყისიერ სიკვდილს, აუცილებელია, რაც შეიძლება, სწრაფად განხორციელდეს სიკვდილის გამომწვევი პროცედურები, როგორიცაა: სისხლგართმევა, ჩხვლეტა, ელექტროშოკი ან გახანგრძლივებული ანოქსია. ცხოველის მოკვლა და მასთან დაკავშირებული სამუშაოები უნდა განხორციელდეს მხოლოდ იმ პირების მიერ, რომლებსაც აქვთ შესაბამისი დონის კომპეტენცია და შეუძლიათ ცხოველთათვის ნებისმიერი სახის ტკივილის, სტრესისა და ტანჯვის მიყენების გარეშე აღნიშნულის განხორციელება.
