ირაკლი ლექვინაძე: მოსალოდნელია საწვავის ფასის შემცირება

2022 წლის მარტიდან დღემდე საქართველოში საწვავის ფასი 1 ლარზე მეტით არის შემცირებული. კონკურენციის სააგენტოს განმარტებით, ეს ამის საფუძველი საერთაშორისო ფასების შემცირება და ეროვნული კურსის გამყარების ტენდენციაა. თუმცა, სააგენტოში მიიჩნევენ, რომ დღესაც შესაძლებელია საწვავის ფასის კორექტირება შემცირების კუთხით.

"2022 წლის მარტიდან დღემდე დაახლოებით 1 ლარზე მეტად არის შემცირებული საწვავზე ფასი, ვგულისხმობ ყველა ტიპის საწვავს, დაწყებული ბენზინ რეგულარით, რომელიც ყველაზე მოთხოვნადი საწვავია, დიზელის ჩათვლით. ამის მთავარი განმაპირობებელი ფაქტორია საერთაშორისო ფასები, რომელიც დღეს მნიშვნელოვნად შემცირებულია და ეროვნული კურსის გამყარების მყარი ტენდენცია. თუმცა, ვთვლით, რომ დღესაც  შესაძლებელია და მოსალოდნელია ფასის კორექტირება შემცირების მიმართულებით", - განაცხადა კონკურენციის სააგენტოს ხელმძღვანელმა ირაკლი ლექვინაძემ. 

გარდა ამისა, კონკურენციის სააგენტოს 5 მსხვილ კომპანიაზე მოკვლევა აქვს დაწყებული, ბაზარზე შესაძლო არაკეთილსინდისიერ ქცევასთან დაკავშირებით, საბოლოო ან შუალედური შედეგი თებერვალში იქნება ცნობილი.

"კონკურენციის ეროვნულმა სააგენტომ 2022 წლის აგვისტოში დაიწყო მოკვლევა, 5 მსხვილი რეალიზატორი კომპანიის წინააღმდეგ. თემა ეხება ბაზარზე შესაძლო არაკეთილსინდისიერ ქცევას, ან შესაძლო შეთანხმებულ ქმედებას, რადგან ჩვენ მონიტორინგის პროცესში დავინახეთ, რომ ერთის მხრივ რუსეთიდან იმპორტირებული საწვავის შემთხვევაში, გაიაფებული იმპორტის ასახვა სათანადოდ და დროში ოპტიმალურ პერიოდში არ ხდებოდა საცალო ბაზარზე, და მეორეს მხრივ ევროპიდან იმპორტირებული საწვავის შემთხვევაში, საბაჟო საწყობიდან კონკურენტ კომპანიებზე ხდებოდა დაახლოებით 0.75-დან - 1 ლარის ფარგლებში უფრო იაფად მიყიდვა საწვავის, ვიდრე საკუთარ ქსელში ხდებოდა შეტანა. ჩვენი მოკვლევა მიმდინარეობს იმ მიმართულებით, ხომ არ უკავშირდება ეს ყველაფერი 5 მსხვილი კომპანიის არაკეთილსინდისიერ ქცევას, ან შესაძლო შეთანხმებულ ქმედებას. ჩვენ ვვარაუდობთ, რომ თებერვალში საბოლოო ან შუალედურ გადაწყვეტილებას გავაცნობთ დაინტერესებულ მხარეებს. ერთია, რა იქნება შედეგი აღნიშნული მოკვლევის და მეორეა, ჩვენ ვამუშავებთ რეკომენდაციებს თუ რა უნდა გაკეთდეს იმისთვის, რომ აღნიშნულ ბაზარზე მომხმარებლების კითხვებს პასუხი გაეცეს, ბაზარი იყოს უფრო კონკურენტუნარიანი და გამჭვირვალე", - აღნიშნა ირაკლი ლექვინაძემ.