ინტეგრირებულ პროგრამებზე ინტერესი 20%-მდე არის გაზრდილი

პროფესიული განათლების ინტეგრირებულ პროგრამებზე ინტერესი წინა წლებთან შედარებით 20%-ით არის გაზრდილი. ამის შესახებ გადაცემა „ბიზნესი რუსთავი 2“-ს პროფესიული უნარების სააგენტოს ინოვაციური სწავლების მიმართულების მენეჯერმა, მარი რუაძემ განუცხადა.

მისი ინფორმაციით, ინტეგრირებულ პროგრამა გულისხმობს იმას, რომ პროგრამის ფარგლებში პროფესიული პროგრამის შეთავაზებასთან ერთად გაერთიანებულია ზოგადი განათლების საშუალო საფეხურის სწავლების კომპონენტი, რაც ნიშნავს,  რომ სტუდენტს ექნება საშუალება   ახალ პროფესიას დაეუფლოს და მიიღოს ახალი პროფესიის კვალიფიკაციის დამადასტურებელი დიპლომი, რომელიც სრული ზოგადი განათლების ატესტატთან იქნება გათანაბრებული.

ამის საფუძველზე კურსდამთავრებულის სურვილიდან გამომდინარე სწავლას განათლების სხვა საფეხურებზე(უნივერსიტეტში) განაგრძობს.

„განათლების სისტემის ყველა რგოლის ძალისხმევით 80-ზე მეტი ავტორიზებული პროფესიული პროგრამა არსებობს, რომელსაც ახორციელებენ პროფესიული საგანმანათლებლო დაწესებულებები, რომლის სასწავლო პერიოდი 3 წელი გრძელდება. „ -აღნიშნავს რუაძე.

პროფესიული უნარების სააგენტოს ინოვაციური სწავლების მიმართულების მენეჯერის განმარტებით, პროგრამაზე დაშვების წინა პირობა არის საბაზო განათლების ანუ ე.წ. 9 კლასის ატესტატის დოკუმენტის ფლობა. შედეგად,სტუდენტებს საშუალება ეძლევათ მოიპოვონ სრული დაფინანსება სახელმწიფოს მხრიდან, იმ შემთხვევაში თუ სახელმწიფო გამოცდებს ჩააბარებენ.

შეგახსენებთ, რომ პროფესიულ პროგრამებზე რეგისტრაცია წელიწადში ერთხელ ცხადდება და  გაზაფხულის მიწურულს დაიწყება.