Tesla-ს სავარაუდო რასობრივი დისკრიმინაციისთვის უჩივიან
ელექტროავტომობილების მწარმოებელ Tesla-ს კალიფორნიის მარეგულირებელი ორგანო სავარაუდო რასობრივი დისკრიმინაციისა და სამუშაო ადგილზე შევწროებისთვის უჩივის.
BBC-ის ცნობით, კალიფორნიის "სამართლიანი დასაქმებისა და საცხოვრებლის დეპარტამენტში" ამ საკითხთან დაკავშირებით Tesla-ს Fremont-ის ქარხანაში დასაქმებულების ასობით საჩივარი შევიდა. ბრიტანული გამოცემის თანახმად, თავად Tesla-ში სარჩელს არასწორს უწოდებენ და აცხადებენ, რომ დისკრიმინაციისა და შევიწროვების ყველანაირ ფორმას მტკიცედ ეწინააღმდეგებიან. კომპანია სასამართლოს საქმის წარმოების შეჩერებას სთხოვს.
DFEH-ის (სამართლიანი დასაქმებისა და საცხოვრებლის დეპარტამენტი) დირექტორის, კევინ კიშის განცხადებით, დისკრიმინაციის დამადასტურებელი დოკუმენტებიც მოიპოვეს.
"Tesla-ს Fremont ქარხანა რასობრივად სეგრეგირებული სამუშაო ადგილია, სადაც ფერადკანიანი თანამშრომლები ექვემდებარებიან რასობრივ შეურაცხყოფას. ასევე დისკრიმინირებულები არიან სამუშაო დავალებების მიღებისას, დისციპლინის, ანაზღაურებისა თუ დაწინაურების საკითხებშიც",- ციტირებს BBC კევინ კიშის განცხადებას.
Fremont-ის ქარხნის თანამშრომლები ამბობენ, რომ იმ სამუშაო სივრცეებს, სადაც ფერადკანიანი და აფროამერიკელი მუშახელია დასაქმებული, მოიხსენიებენ ისეთი რასისტული ისტორიული სახელებით, როგორიცაა "პლანტაცია".
