აშშ-ის იუსტიციის დეპარტამენტმა Bitfinex-ის სავალუტო ბირჟიდან მოპარული $3,6 მლრდ-ის Bitcoin-ი ამოიღო
2016 წელს Bitfinex-ის სავალუტო ბირჟაზე ჰაკერული გზით მოპარული დაახლოებით $3,6 მლრდ-ის ბიტკოინია ამოღებული, რაც კრიპტოვალუტის ყველაზე დიდ ამოღებაა, რაც კი ოდესმე განხორციელებულა აშშ-ს იუსტიციის დეპარტამენტის მიერ,- ნათქვამია დეპარტამენტის განცხადებაში.
იუსტიციის დეპარტამენტის ცნობით, მანჰეტენზე ორი ეჭვმიტანილი დააკავეს, 34 წლის ილია ლიხტენშტეინი და მისი მეუღლე, 31 წლის ჰეზერ მორგანი.
"სავარაუდოდ, მათ შეთქმულება მოაწყვეს 119,754 ბიტკოინის გათეთრებაზე, რომელიც მას შემდეგ მოიპარეს, რაც ჰაკერული თავდასხმისას Bitfinex-ის სისტემები დაირღვა და დაიწყო 2000-ზე მეტი არაავტორიზებული ტრანზაქციის განხორციელება. ტრანზაქციები განთავსდა ციფრულ საფულეში, რომელსაც აკონტროლებდა ლიხტენშტეინი. ხანგრძლივი და რთული გათეთრების პროცესი, საბოლოოდ იმით დასრულდა, რომ მოპარული თანხების ნაწილი შეტანილი იქნა ლიხტენშტეინის და მორგანის მიერ კონტროლირებად ფინანსურ ანგარიშებზე", - აცხადებენ ფედერალური პროკურორები.
