სებასტიან მოლინეუსი: საქართველოს ეკონომიკამ მდგრადობა აჩვენა, წელს 5.5%-იან ზრდას ველით
მსოფლიო ბანკი საქართველოს ეკონომიკის 5.5%-იან ზრდას ელის. მოლოდინებსა და გამოწვევებზე სამხრეთ კავკასიაში მსოფლიო ბანკის რეგიონული დირექტორის სებასტიან მოლინეუსმა საქართველოს ეროვნულ ბანკთან ერთად გამართულ ღონისძიებაზე ისაუბრა. სებასტიან მოლინეუსმა აღნიშნა, რომ მსოფლიო ეკონომიკა რთული გამოწვევების წინაშეა და გლობალური ზრდის მაჩვენებელი საფინანსო ისტიტუტმა 4.1%-დან 2.9%-მდე შეამცირა.
"ვარდნა ძირითადად განპირობებულია მაღალი ინფლაციისგან, რომელსაც თან ერთვის გამკაცრებული მონეტარული პოლიტიკის მდგომარეობა, გლობალური მიწოდების ჯაჭვის ხარვეზები და რა თქმა უნდა ამ ყოველივეს ამძაფრებს მიმდინარე ომი უკრაინაში და რუსეთის წინააღმდეგ დაწესებული სანქციები. აღნიშნულის გათვალისწინებით, მაინც გვაქვს პოზიტიური სიახლეები. ჩვენ ვხედავთ, რომ საქართველოს ეკონომიკამ განსაკუთრებული მდგრადობა აჩვენა. ჩვენ გვაქვს მოლოდინი, რომ საქართველოს ეკონომიკის ზრდა დაახლოებით 5.5%-ს მიაღწევს, რაც საწყისი პროგნოზის 2.5%-ის გაუმჯობესებული მაჩვენებელია," - განაცხადა სებასტიან მოლინეუსმა.
ერთობლივ ღონისძიებაზე პანდემიასა და რუსეთ-უკრაინის ომზე იმსჯელეს. საფინანსო ინსტიტუტმა 2022 წლის „გლობალური ეკონომიკური პერსპექტივების” ანგარიში წარადგინა.
კვლევაში ასევე ნათქვამია, რომ ინფლაციის წნეხი იზრდება. მიმდინარე წელს, მაისის ჩათვლით, ინფლაციის ორნიშნა მაჩვენებელი დაფიქსირდა, რომლის ზრდის 74 პროცენტი გამოწვეულია სურსათზე და საწვავზე ფასების მატებით. საბაზისო პროგნოზთან დაკავშირებული რისკები მაღალ დონეზე რჩება, მათგან ყველაზე მნიშვნელოვანია: უკრაინაში ომის შემდგომი ესკალაცია ან გაჭიანურება და სანქციების ნებისმიერი მეორადი ეფექტი; ინფლაციის წნეხის ზრდა, რაც ხელს უშლის ეკონომიკური საქმიანობის განვითარებას და COVID-19 - ის პანდემია, განსაკუთრებით ახალი ვარიანტების და ვაქცინაციის დაბალი მაჩვენებლის კონტექსტში.
