საქართველოს რკინიგზა $500 მლნ-ის ევროობლიგაციების რეფინანსირებას ვადაზე ადრე გეგმავს

„საქართველოს რკინიგზამ“ შესაძლოა, 500 მლნ დოლარის ევროობლიგაციების რეფინანსირება ვადაზე ადრე მოახდინოს.

Standard and Poor’s-ის ინფორმაციით, კომპანიის მენეჯმენტმა უკვე დაიწყო მოლაპარაკებები ინვესტორებთან და პარტნიორ ბანკებთან.

„2022 წლის ივლისში გასანაღდებელ $500 მლნ-ის ევროობლიგაციების რეფინანსირებას ჩვენ ძველებურად განვიხილავთ როგორც „საქართველოს რკინიგზის“ მოკლევადიან საკრედიტო რისკს, ამიტომ ვინარჩუნებთ რეიტინგის ნეგატიურ პერსპექტივას. ადგილობრივი ბაზარი ძალიან მცირეა საკმარისი ლიკვიდურობის უზრუნველსაყოფად და დიდი ალბათობით, კომპანია კაპიტალის საერთაშორისო ბაზრებს მიმართავს. კაპიტალის საერთაშორისო ბაზრები კი განვითარებადი ქვეყნების ემიტენტებისთვის კვლავაც რთულად მისაღწევია. ამის გამო საქართველოს რკინიგზა, შესაძლოა, ისევ სახელმწიფოს მხარდაჭერას დაეყრდნოს. რკინიგზამ უკვე  დაიწყო დიალოგი ინვესტორებთან და პარტნიორ ბანკებთან და მენეჯმენტი ელის ამ სესხის რეფინანსირებას 2021 წლის მეორე კვარტალში“, - ნათქვამია  Standard and Poor’s -ის ახალ შეფასებაში.

გავლენიანმა საკრედიტო სააგენტომ „საქართველოს რკინიგზას“ გრძელვადიანი რეიტინგი "B +" დონეზე დაუდასტურა, რეიტინგის პროგნოზი „ნეგატიურია“, ისევე როგორც საქართველოს სუვერენული რეიტინგის პროგნოზიც.

Standard and Poor’s -ის შეფასებით უარყოფითი სცენარია: „საქართველოს რკინიგზის“ (GR) რეიტინგი შემცირდება, თუ დამოუკიდებელი საკრედიტო პროფილი მნიშვნელოვნად გაუარესდება. ეს კი რამდენიმე შემთხვევაში შეიძლება მოხდეს:

საერთაშორისო კაპიტალის ბაზარზე შეზღუდული წვდომის გამო, ლიკვიდურობის ბუფერების მნიშვნელოვანი შემცირება. ასევე მისი შემცირება რეფინანსირების მომავალი საჭიროებების გათვალისწინებით ან ფულადი რეზერვების დაჩქარებული შემცირებით კაპიტალის ხარჯვის ან ფულადი სახსრების გაუთვალისწინებელი გადინების გზით, როგორიცაა დივიდენდები, ან ქეშის დაკარგვა.

კომპანიის კაპიტალის სტრუქტურის გაუმჯობესების მიზნით, სახელმწიფოს მხრიდან დამხმარე ზომების არარსებობა. GR-ის ოპერაციული მუშაობის მხოლოდ ზომიერი გაუმჯობესების ვარაუდით, ჩვენთვის ნაკლებად სავარაუდოა რომ 2022 წლის ივლისში $500 მილიონის ობლიგაციის დასაფარად საკმარისი ფულადი სახსრები შეიქმნება.

ტვირთის მოცულობის შემცირება ან საგრძნობლად დაბალი ტარიფების შემცირება, რაც ითვალისწინებს ოპერაციიდან მიღებულ შემოსავალსა და თანხებს.

დადებითი სცენარია: იმისთვის, რომ ჩვენი შეფასება დაბრუნდეს „სტაბილურ“ პროგნოზზე, საჭიროა:

GR-ის $500 მილიონის სესხის დროული რეფინანსირება 2022 წლის ივლისამდე;

დამოუკიდებელი საკრედიტო პორტფელის მდგრადობა, რომელიც ამჟამად შეფასებულია “b” რეიტინგით;

მთავრობის სტრატეგია და ჩამოყალიბებული გეგმა საქართველოს რკინიგზის კაპიტალის სტრუქტურის განმტკიცების, ან მუდმივი სახელმწიფო მხარდაჭერის უზრუნველსაყოფად;