აგრიაპი: სასტუმროების ნაწილი დაიხურა, რაც ჩვენს შემოსავლებზეც აისახა

თაფლის მწარმოებელი კომპანია „აგრიაპის“ დამფუძნებელი დავით ალექსიძე „ბიზნესპარტნიორთან“  თაფლის რეალიზაციის ზრდაზე საუბრობს და აცხადებს, რომ თუ პანდემიის პერიოდში გაყიდვები ვიტყვით HoReCa სექტორში დრამატულად იყო შემცირებული, ახლა სიტუაცია შეიცვალა და სექტორში რეალიზაცია ნაწილობრივ აღდგა.

მისი ინფორმაციით, სამასპინძლო ბიზნესის ნაწილმა პანდემიის შედეგად არსებულ ფინანსურ სირთულეებს ვერ გაუძლო და ბაზრიდნ გავიდა, რაც საბოლოო ჯამში „აგრიაპის“ შემოსავლებზეც აისახა.

დავით ალექსიძის განმარტებით, დღეს კომპანიის გაყიდვების 70% რითეილ, 30%-ი კი HoReCa სექტორზე მოდის.

მისი ინფორმაციით, კომპანია ამ დროისთვის  15 ფერმერთან თანამშრომლობს, რომლისგანაც ნატურალურ თაფლს იბარებს და შემდეგ აფასოებს.

როგორც ალექსიძე აცხადებს, საფუტკრე მეურნეობები, საიდანაც „აგრიაპი“ მეფუტკრეობის სუფთა და ბუნებრივ პროდუქტებს იბარებს, საქართველოს სხვადასხვა რეგიონში მდებარეობს. მათ შორის, წაბლის თაფლს კომპანია საირმის ხეობიდან, მდინარე წაბლარისწყლის ხეობაში განთავსებულ საფუტკრე მეურნეობებიდან იბარებს, გაზაფხულის თაფლს ვანისა და ბაღდათის მუნიციპალიტეტებში განთავსებული საფუტკრე მეურნეობებიდან, ხოლო ცაცხვის თაფლი საირმის ხეობიდან, ასევე კახეთიდან, სადაც საფუტკრე მეურნეობა განთავსებულია სოფელ ფშაველში, ომალოსკენ მიმავალ გზაზე, მდინარე სტორის ხეობაში. კომპანია ასევე თანამშრომლობს ყაზბეგში არსებულ საფუტკრე მეურნეობასთანაც.

„აგრიაპის“ დამფუძნებელი აცხადებს, რომ კომპანია პროდუქტის რეალიზაცია ხდება როგორც HoReCa სექტორში (როგორც წონით, ისე პორციული, 10 გრამიანი შეფუთვებით), ისე რითეილ სექტორში (პორციული ფორმით, ასევე ქილებში)

შეგახსენებთ, „აგრიაპის“ თაფლის პროდუქცია ქართულ ბაზარზე 2018 წლიდანაა წარმოდგენილი, კომპანიის პროდუქცია წარმოდგენილია საცალო ვაჭრობის ქსელების უმრავლესობაში.