J.P Morgan: 2030 წლისთვის მსოფლიოს დამატებით $1.3 ტრილიონის ენერგეტიკული ინვესტიცია დასჭირდება
ამერიკული მულტინაციონალური საინვესტიციო ბანკის, J.P. Morgan-ის გათვლებით, 2030 წლისთვის მსოფლიოს ენერგეტიკის სექტორში დამატებით $1,3 ტრილიონის ინვესტიცია დასჭირდება.
ეს თანხა ენერგეტიკული კრიზისის თავიდან ასაცილებლად ყველა სახის (განახლებადი ენერგიები, ნავთობი, გაზი) ენერგიის გამომუშავებას და შესაბამისი ინფრასტრუქტურის მოწყობას უნდა მოხმარდეს. J.P. Morgan-ის წლიურ ენერგეტიკულ მიმოხილვას Reuters აქვეყნებს.
"მიმდინარე ტენდენციებზე დაყრდნობით, ჩვენი მთავარი დასკვნაა, რომ 2030 წლისთვის ენერგიაზე მოთხოვნის ზრდა გადააჭარბებს მიწოდების ზრდას დაახლოებით 20%-ით. ეს, პირველ რიგში, განპირობებული იქნება განვითარებადი ეკონომიკების ქცევით და მათი მცდელობებით, რომ თავიანთი მოქალაქეები გამოიყვანონ სიღარიბიდან“, - ციტირებს საინვესტიციო ბანკის ანალიტიკოსების მარკო კოლანოვიჩისა და კრისტიან მალეკის სიტყვებს Reuters.
J.P. Morgan-ის პროგნოზით, 2030 წლისთვის მხოლოდ ნავთობზე მოთხოვნა გაიზრდება დაახლოებით 10%-ით, ხოლო გაზზე დაახლოებით 18%-ით. შესაბამისად, განსახორციელებელმა ინვესტიციამ ყველა მიმართულება უნდა მოიცვას, მათ შორის, ნავთობი, გაზი, ბირთვული და განახლებადი ენერგიები.
"მზის პანელები ვერ შეცვლიან ზეთს, რომელიც საჭიროა, მაგალითად, ნავთობქიმიკატების ინდუსტრიულ წარმოებაში“, - ნათქვამია ორგანიზაციის მიმოხილვაში.
ამასთან, J.P. Morgan ვარაუდობს, რომ ენერგეტიკის მიმართულებით 2022 წელს გლობალური საბოლოო დანახარჯები მშპ-ს 9.5%-მდე გაიზრდება მაშინ, როდესაც ეს მაჩვენებელი 2015-2019 წლებში საშუალოდ მშპ-ს 8.4% იყო.
