"ინვესტორების ქვეყანაში შემოყვანა მწვანე სამუშაო ადგილების შექმნას ხელს შეუწყობს"

„საქართველოს ენერგეტიკის განვითარების ფონდმა“ პარტნიორ ლიეტუვურ კომპანია „ვიასოლისთან“ ერთად თბილისის 3 და ლანჩხუთის 2 საჯარო სკოლის მზის ელექტროსადგურით აღჭურვის პროექტი განახორციელა. ამის შესახებ გადაცემა „ბიზნესი რუსთავი 2-ს“ საქართველოს ენერგეტიკის განვითარების ფონდის ხელმძღვანელმა, ჯაბა ხმალაძემ განუცხადა.

მისი თქმით, აღნიშნულმა პროექტმა, ბოლო სამი წლის განმავლობაში 18 საჯარო სკოლა, საქართველოს ტექნიკური უნივესიტეტი და თავდაცვის სამხედრო ბაზები მოიცვა. პროექტის ჯამური ბიუჯეტი 1.8 მილიონ ევროს შეადგენს. ჯამურად პროექტის დადგმული სიმძლავრე 1.3 მგვტ-ია. ამასთან, აღსანიშნავია, რომ ქვეყანაში მსგავსი სიდიდის მზის ელექტროსადგური არ არსებობს.

“პროექტი ძალიან მნიშვნელოვანია საგანმანათლებლო მიმართულებით. მოსწავლეებს სკოლებში, ადგილზე აქვთ საშუალება გაეცნონ, თუ როგორ ხდება ელექტროენერგიის გამომუშავება, რაც დარგის პოპულარიზაციის განმაპირობებელია,"- აცხადებს ხმალაძე.

მისი მტკიცებით, ინვესტორების ქვეყანაში შემოყვანა მწვანე სამუშაო ადგილების შექმნას მნიშვნელოვნად ხელს შეუწყობს. ასევე, ამგვარი პროექტები, ქვეყნის იმპორტდამოკიდებულობას მნიშველოვნად შეამცირებს.

გარდა ამისა, მსგავსი პროექტები განახლებადი ენერგიების მიმართულებით  ასოცირების ხელშეკრულებით აღებულ ვალდებულებას პასუხობს.

"საქართველოს ენერგეტიკის განვითარების ფონდის" ხელმძღვანელი აღნიშნავს, რომ ქვეყნისთვის იმპორტდამოკიდებულობა ერთგვარი გამოწვევაა, თუმცა ეს როგორც ადგილობრივ, ასევე საერთაშორისო ინვესტორებისთვის მამოტივირებელია, რათა ქვეყანაში ინვესტიციები განახორციელონ და რესურსები აითვისონ.  

ცნობისთვის:მწვანე სამუშაო ადგილები სულ მცირე შეიძლება შეიქმნას ენერგეტიკისა და სამთო მოპოვების, სოფლის მეურნეობის, ტრანსპორტირების, მშენებლობის და წარმოების სექტორებში.