"ენერგოეფექტურ შენობებში კომუნალური დანახარჯები მინიმუმ 35-40%-ით ნაკლებია"

ენერგოეფექტურობის მინიმალური სტანდარტების დაკმაყოფილება მშენებლობის ხარჯებს ზრდის, თუმცა ამასთან ერთად შენობა-ნაგებობებში ენერგომოხმარებას მნიშვნელოვნად ამცირებს.

როგორც ეკონომიკის სამინისტროს ენერგოეფექტურობისა და განახლებადი ენერგიების პოლიტიკისა და მდგრადი განვითარების დეპარტამენტის უფროსმა მარიტა არაბიძემ „ბიზნესპარტნიორთან“ საუბრისას აღნიშნა, საერთაშორისო გამოცდილება აჩვენებს, რომ ენერგოეფექტურ შენობებში კომუნალური დანახარჯები მინიმუმ 35-40%-ით ნაკლებია.

„პირობითად, თუ მომხმარებელი არაენერგოეფექტურ საცხოვრებელ სახლში კომუნალურებში 100 ლარს იხდის, ენერგოეფექტურში მოუწევს 60 ლარის გადახდა. პრაქტიკა ამას აჩვენებს. ეს არ არის მითი, ნამდვილად ასეა. თუ ჩვენ ვსაუბრობთ იმაზე, თუ როგორ გაძვირდება ახალი შენობები, უნდა ვთქვათ, რომ ჩვენ გავაკეთეთ რეგულირების ზემოქმედების ანალიზი და გამოიკვეთა, რომ ენერგოეფექტურობის მინიმალური სტანდარტების ამოქმედების შედეგად, ქვეყანაში მიმდინარე მშენებლობების თვითღირებულება დაახლოებით 5-10 პროცენტით გაიზრდება. თუმცა დანაზოგი, რაც კომუნალური ხარჯების შემთხვევაში ექნება მომხმარებელს, ბევრად მეტია. ასე რომ, საბოლოო ჯამში, მომხმარებელი მოგებული რჩება.“-აღნიშნა მარიტა არაბიძემ.

შეგახსენებთ, რომ ენერგოეფექტურობის მინიმალური მოთხოვნები საქართველოში 2023 წლის პირველი ივლისიდან ამოქმედდა. შესაბამისად, ენერგოეფექტურობის დამადასტურებელი დეკლარაციის წარდგენის გარეშე სამშენებლო პროექტი ნებართვას ვეღარ მიიღებს.

რეგულაცია ყველა შენობაზე გავრცელდება, გარდა 50 კვ.მ-ზე ნაკლები შენობისა, და ასევე ენერგოეფექტურობის მოთხოვნების დაკმაყოფილება არ დაევალებათ კულტურული ღირებულების მატარებელ თუ რელიგიური დანიშნულების ნაგებობებს.