როგორ ხორციელდება სანქცირებული პროდუქციის გადაადგილების კონტროლი საქართველოში - პრემიერის განმარტება
"საქართველოს ფინანსთა სამინისტრო ევროპარლამენტის საბაჟო რეგულაციებთან სრული შესაბამისობით ახორციელებს საბაჟო კონტროლსა და საბაჟო ზედამხედველობას",- ამის შესახებ ირაკლი ღარიბაშვილმა პარლამენტში ინტერპელაციის წესით წარდგენისას განცახადა.
პრემიერი ირწმუნება, რომ სანქცირებული პროდუქცია საქართველოს გავლით სანქციების მონაწილე ქვეყნებში არ გადაადგილდება.
"საქონლის შემოტანა და გატანა ხორციელდება საქართველოს საბაჟო საზღვართან მდებარე 20 საბაჟო გამშვები პუნქტის გავლით. საქონელი 1 000-ზე მეტი მებაჟის კონტროლს ექვემდებარება. რუსეთ-საქართველოს საზღვარზე გადაადგილებული ტვირთების კონტროლის გასაძლიერებლად საბაჟო-გამშვებ პუნქტს ყაზბეგში გაეზარდა თანამშრომელთა რაოდენობა. ადგილზე კი სრული კონტროლია.
საბაჟო რისკების მართვის სპეციალური ჯგუფების მიერ შეიქმნა ახალი საბაჟო რისკების პროფილები სამხედრო ორმაგი დანიშნულების და ასევე ყველა იმ პროდუქციაზე, რომელიც მოხვედრილია სანქციების სიაში. ნებისმიერ ტიპის საქონელი ექვემდებარება მკაცრ საბაჟო კონტროლს. მკაცრად გონტროლდება საქართველოში გაიმპორტებული სანქცირებული საქონლის ექსპორტის შემთხვევები, რათა არ მოხდეს რუსული, ან სხვა სანქცირებული საქონლის მოხვედრა სანქციების მონაწილე ქვეყნებში, ან პირიქით",- განაცხადა ღარიბაშვილმა.
