უძრავი ქონების ბაზარი პანდემიამდელ ნიშნულს 2023 წლიდან დაუბრუნდება
კომერციულ ფართებზე მოთხოვნა მკვეთრად მცირდება,თუმცა ფასები კლების ტენდენციით არ ხასიათდება. ბაზრის ამ უჩველო ქცევის მიზეზებს „ბიზნესპარტნიორთან“ „რემაქს კაპიტალის“ დამფუძნებელი, მარიამ ასათიანი განმარტავს.
„პარადოქსულია ჩვენი ბაზარი. იმის მიუხედავად, რომ მოთხოვნა და მოსახლეობის მსყიდველუნარიანობა შემცირებულია, ფასების დრამატული ვარდნა არ გვაქვს. პანდემიის დასაწყისში კი ამას ყველა პროგნოზირებდა. ამას შეიძლება რამდენიმე მიზეზი ჰქონდეს. მაგალითად, უძრავი ქონება და საინვესტიციო უძრავი ქონება თავმოყრილია არასაშუალო სეგმენტის და არაბიუჯეტური შემოსავლის მქონე სეგმენტის ხელში, რომელიც პანდემიის პირობებში ნაკლებად მოწყვლადია. თუმცა აქაც, ყველაფერი მაინც იმაზეა დამოკიდებული, თუ რამდენი ხანი გაგრძელდება პანდემიასთან დაკავშირებით არსებული კრიზისი. რამდენიმე თვე შეიძლება მოცდა, თუმცა, თუ ეს გაგრძელდება მეტი დროით, მაინც მოსალოდნელია, რომ ფასებზეც აისახოს“,- განაცხადა ასათიანმა.
მან აქვე ბიზნეს ცენტრებში გაზრდილ ვაკანტურობაზე და საოფისე ფართების მიმართულებით არსებულ მდგომარეობაზეც ისაუბრა.
„მოთხოვნა შემიცირებულია საოფისე ფართებზეც. თუმცა, დეკლარირებულ ფასებში დიდ ვარდნას ვერც აქ ვხედავთ. როგორც ჩანს, ბიზნეს ცენტრები მაინც ინარჩუნებენ რესურსს და ცდილობენ, რომ არსებული პერიოდი შენარჩუნებული ფასებით გადააგორონ. ვაკანტურობა საკმაოდ მაღალია და რასაც ვხედავთ, არის გარკვეული როტაციაც. რასაკვირველია, არსებულ დამქირავებლებთან მათი შენარჩუნების მიზნით. ფასები დაკორექტირდა. გარკვეულ კომპანიებს გაუჩნდათ შესაძლებლობა, რომ გადავიდნენ გაუმჯობესებულ პირობებში. ასევე, ვხედავთ პირიქითაც. ვისი შემოსავლებიც გაუარესებულია მათ დაბალბიუჯეტური ოფისები უნდათ, ხოლო ზოგი უსაფრთხოებიდან გამომდინარე ერიდება დიდ ბიზნეს ცენტრებს და პატარა ბინებში მოწყობილ ოფისებზე გაუჩნდათ მოთხოვნა“,- აღნიშნა მან.
„რემაქს კაპიტალის“ დამფუძნებელი ვარაუდობს, რომ მომდევნო ორი წელი ბაზრის აღდგენას დასჭირდება, პანდემიამდელ ნიშნულებს კი ის 2023 წლიდან დაუბრუნდება.
ყველაფერი დამოკიდებულია იმაზე, თუ რამდენი ხანი გაგრძელდება პანდემია. თუ დაავადების გავრცელების ეს მწვავე პერიოდი გაზაფხულთან ერთად ჩაცხრა, სავარაუდოდ, სრული 2021-2022 წელი დაეთმობა აღდგენას და 2023 წლიდან ვვარაუდობთ პანდემიამდელ ნიშნულებზე დაბრუნებას. ესეც სახარბიელო შედეგი იქნება იმის გათვალისწინებით, თუ როდის დამთავრდება პანდემია. ალბათ, საბოლოო აღდგენა მანამდე არ უნდა ვივარაუდოთ“,- ამბობს ასათიანი.
