სამკერვალო საწარმო "ლიდერი“ პროდუქციის ბრიტანულ Amazon-ზე განთავსებას გეგმავს
სამკერვალო საწარმო „ლიდერი“ საკუთარი პროდუქციის საერთაშორისო ონლაინ პლატფორმაზე, ბრიტანულ Amazon-ზე განთავსებას გეგმავს. ამ ეტაპზე მიმდინარეობს მოლაპარაკებები, რომლის დასრულებასაც საწარმო უმოკლეს ვადებში დადებითი შედეგით ელის.
საწარმოს სამომავლო გეგმები ამით არ სრულდება. „ლიდერი“ საკუთარი პროდუქციის ექსპორტზე გატანასა და საერთაშორისო გამოფენებში მონაწილეობის მიღებასაც გეგმავს.
როგორც „ლიდერის“ დამფუძნებელმა ნინო გიორგაძემ გადაცემა „ბიზნესპარტნიორში“ განაცხადა, საერთაშორისო გამოფენებში მონაწილეობის მიღება საწარმოს საექსპორტო პოტენციალის გაზრდაში დაეხმარება.
ნინო გიორგაძის თქმით, სამომავლო გეგმების განხორციელებაში საწარმოს არასამთავრობო ორგანიზაცია „ეკონომიკური განვითარების პოლიტიკის ცენტრი“ ეხმარება.
ცნობისთვის, სამკერვალო საწარმო „ლიდერი“ შიდა ქართლში მდებარეობს. სამკერვალო ხელს უწყობს ქალების განათლებასა და დასაქმებას. კომპანია ყოველწლიურად ატარებს ჭრა-კერვა-მოდელირების კურსებს გორში და ეხმარება სოციალურად მოწყვლად ქალებს სამეწარმეო უნარჩვევების გამომუშავებაში.
აღსანიშნავია, რომ "ლიდერქიდსი" ბიზნესდაჯილდოება 2020-ის ფინალისტია ნომინაციაში "გამორჩეული სოციალური პასუხისმგებლობისთვის".
