პოსტპანედემურ პერიოდში ფეროშენადნობებზე მოთხოვნა გაიზარდა

საქართველოდან ფეროშენადნობების ექსპორტი გაიზარდა. ქვეყნიდან საერთაშორისო ბაზარზე 2021 წლის იანვარ-მაისში 144.3 მლნ დოლარის ფეროშენადნობები გავიდა, წლიური ზრდა 32.1%-ია. 

ამავდროულად ისტორიულ მაქსიმუმს მიუახლოვდა ფერო სილიკომანგანუმის ღირებულებაც. დღეის მდგომარობით, 1 ტონა ნედლეული 1700 დოლარად ივაჭრება.

როგორც ფეროშენადნობთა ასოციაციაციის თავმჯდომარემ, ნუგზარ კევლიშვილმა "ბიზნესპარტნიორთან" განაცხადა, აღნიშნულ შედეგებზე გასვლა ერთი მხრივ, მსოფლიო ეკონომიკაში არსებულ ძვრებს, მეორე მხრივ კი მსოფლიოში აღნიშნული ნედლეულის დეფიციტს უკავშირდება.

„პოსტპანედემურ პერიოდში განსაკუთრებით გაიზარდა ფერო სილიკონმანგანუმზე მოთხოვნა. რაც ერთი მხრივ, ეკონომიკაში არსებულმა ძვრებმა, ახალმა პროექტებმა და მთელ მსოფლიოში ეკონომიკურმა ზრდამ განაპირობა. კიდევ ერთი ფაქტორი იყო ისიც, რომ ინდოეთში ამ პერიოდში ქარხნებმა შეაჩერეს წარმოებები. ინდოეთი ამ ნედლეულის ერთ-ერთი მსხვილი ექსპორტიორია და ფეროსილიკონ მაგნგანუმის ინდოეთის წილი უკვე სხვა მწარმოებლებმა ჩაანაცვლეს,“ - ამბობს ნუგზარ კევლიშვილი.

ასოციაციაში ფიქრობენ, რომ საქართველოში აღნიშნულ ბიზნესს დიდი პოტენციალი აქვს და დადებითი ტრენდის შენარჩუნების შემთხვევაში, ქვეყანაში ფერო სილიკომანგანუმის წარმოება გაიზრდება.

ფეროშენადნობები სასაქონლო ჯგუფებიდან საექსპორტო ათეულში მესამე ადგილს იკავებს.