"მოინახულე" - პანდემიის პერიოდში შექმნილი ყვავილების ონლაინ მაღაზია
კოვიდ პანდემიის პერიოდში ქართულ ბაზარზე ყვავილების ახალი ონლაინ მაღაზია გამოჩნდა, განსხვავებული კონცეფციით.
ორი მეგობარის მიერ შექმნილი ბიზნესი, ბაზარზე სულ ოთხი თვეა ოპერირებს, თუმცა მომხმარებლების მოზიდვა და საკუთარი ნიშის მოპოვება უკვე მოახერხა. კომპანია საკუთარი თაიგულების მიქსში, საქართველოს სხვადასხვა რეგიონის, გამომშრალ მცენარეებს იყენებს, რითაც ეხმარება ქართველ ფერმერებსაც.
როგორც კომპანიის თანადამფუძნებელი სოფო აბრამიშვილი „ბიზნესპარტნიორთან“ განმარტავს, წამოწყებას იმაზე დიდი გამოხმაურება მოყვა, ვიდრე ამას თავად კომპანიაში ელოდნენ. ეს კი, თავის მხრივ, „მოინახულესთვის“ განვითარებისა და პრდუქტის მეტად დახვეწვისთვის დიდი სტიმული აღმოჩნდა.
„ბაზარზე ბევრი ყვავილების მაღაზიაა, რომლებიც მომხმარებელს სხვადასხვა თაიგულს სთავაზობს, თუმცა ჩვენ ვფიქრობთ, რომ ჩვენი თაიგულები განხვავებულა, ისინი შეიცავს ისეთ მცენარეებს, რომლებიც ცოცხალ მცენარეებთან ერთად ქმნიან განსხვავებულ მიქსს და ასევე დიდი ყურადღებას ვანიჭებთ ასევე მათ შეფუთვას," - ამბობს სოფო აბრამიშვილი.
ახლად შექმნილი კომპანია მომხმარებლებს თაიგულებთან ერთად, ქართველი დიზაიერებისა და სტარტაპერების პროდუქციით დაკომპლექტებულ სასაჩუქრე ნაკრებებსაც სთავაზობს. ამ ეტაპზე „მოინახულე“ 30-მდე სტარტაპერთან და დიზაინერთან თანამშრომლობს, თუმცა სამომავლოდ ამ მიმართულების გაფართოებასაც გეგმავს.
