ლექვინაძის უწყება ტურისტულ სექტორში კონკურენციის შესაძლო შეზღუდვაზე მოკვლევას იწყებს
კონკურენციის სააგენტო მომდევნო კვირაში ტურისტულ სექტორში არაკეთილსინდისიერი კონკურენციის შესაძლო ფაქტთან დაკავშირებით მოკვლევის დაწყებას გეგმავს. ამასთან, საზოგადოებისთვის სადაზღვეო სექტორში 2 კომპანიას შორის არაკეთილსინდისიერი კონკურენციის შესაძლო ფაქტის მოკვლევის შედეგებიც გახდება ცნობილი.
ამ ეტაპზე სააგენტოში 3 ბაზრის მონიტორინგი მიმდინარეობს (საავტომობილო საწვავის ბაზარი; საპორტო გადაზიდვები; ფარმაციის ბაზარი).
ამ დროისთვის ხორციელდება 4 მოკვლევაც, მათ შორის 3 - არაკეთილსინდისიერი კონკურენციის შესაძლო ფაქტზე და 1 - შეთანხმებულ ქმედებაზე კონკურენტულ სატენდერო პროცესში.
2020 წლის განმავლობაში სააგენტომ დაასრულა 5 ბაზრის მონიტორინგი. დასრულებულია ასევე 2 მოკვლევაც, სადაც ერთში დაფიქსირდა დომინანტური მდგომარეობის ბოროტად გამოყენების ფაქტი, ეკონომიკურ აგენტს კი დაეკისრა შესაბამისი სანქცია, მეორეში კი დადასტურდა არაკეთილსინდისიერი კონკურენციის ფაქტი. გაიცა ერთი თანხმობა ეკონომიკური აგენტების კონცენტრაციის შესახებაც.
