კასპის საკონსერვო ქარხანა ნატურალური წვენების წარმოებას ოქტომბრიდან დაიწყებს

კასპის საკონსერვო ქარხანა ნატურალური წვენების წარმოების დაწყების მიმდინარე წლის ოქტომბრიდან გეგმავს.

როგორც „ბიზნესპარტნიორს“ კომპანიის დირექტორმა ოთარ მერებაშვილმა განუცხადა, საწარმო დანადგარების მოლოდინშია, რომლებიც უახლოეს ორ თვეში უნდა ჩამოვიდეს. განიხილება ყველა სახეობის ხილისა და ციტრუსის წვენების ჩამოსხმა.

„დანადგარები რომ შემოვა, წარმოებას მაშინვე დავიწყებთ. პირველი ის ხილი იქნება, რომელიც სეზონურად მოუსწრებს. ვაშლი, მსხალი, ფეიხოა, მანდარინი, კომში. თუ მაგალითად,  ვაშლით დავიწყეთ, ყველა დანარჩენი აუცილებლად მოჰყვება,“- აცხადებს ოთო მერებაშვილი.

რაც შეეხება საწარმოს გეგმებს ხორცის კონსერვების წარმოებასთან დაკავშირებით, ოთო მერებაშვილის თქმით, ამ ეტაპზე საკითხი დაპაუზებულია. თუ როდის განახლდება საკითხი წვენების წარმოების პროცესის წარმატებით წარმართვაზეა დამოკიდებული.

შეგახსენებთ, კასპის საკონსერვო ქარხანა (შპს TMT) 2006 წელს, კასპის საკონსერვო კომბინატის ბაზაზე დაფუძნდა, რომელიც 1961 წლიდან ფუნქციონირებდა. კომპანია აწარმოებს ნატურალურ, ეკოლოგიურად სუფთა და უსაფრთხო   პროდუქციის ნაირსახეობებს.

დღესდღეობით TMT-ს პროდუქცია წარმოდგენილია როგორც მსხვილ სუპერმარკეტებში, ისე მსხვილ ქსელებში. 2008 წლიდან კომპანია აწარმოებს ექსპორტს ისეთ ქვეყნებში როგორიცაა გერმანია, ავსტრია, ჩეხეთი და სხვა.