Geparts -ის სერვისზე მოთხოვნა მზარდია

ქართული სტარტაპის Geparts-ის სერვისზე, ადგილობრივ ბაზარზე, მოთხოვნა მზარდია. ვირტუალური ავტოასისტენტი მომხმარებლებს სასურველი ავტონაწილის მოძიებას უმარტივებს.

ამას კი, მესენჯერის ჭკვიანი ჩატბოტი მხოლოდ ავტომობილის ვინ კოდის იდენტიფიცირებით, 4 წმ-ში ახერხებს, რადგან სტარტაპი პარტნიორ ორგანიზაციებში არსებული ავტონაწილების ასორტიმენტს live რეჟიმში აღიქვამს.

დღეს Geparts-ის ბაზაში ავტონაწილების უკვე მილიონამდე კატეგორიაა. სტარტაპს პროდუქციის 10 უმსხვილეს იმპორტიორ კომპანიასთან და ასევე ისეთ ოფიციალურ ცენტრებთან აქვს პირდაპირი ინტეგრაცია, როგორებიცაა მაგალითად, Audi და Kia.  შესაბამისად, მზარდია მომხმარებელთა რაოდენობაც.

როგორც Geparts-ის დამფუძნებელი, პაატა ბერიაშვილი „ბიზნესპარტნიორთან“ აცხადებს, შედეგის მიღწევაში სტარტაპს პარტნიორი კომპანია "რეინვენთ ჰოლდინგი"  დაეხმარა.

„სანამ ჩატბოტს გავუშვებდით, გყვავდა 15 000 მომხმარებელი. რაც ჩატბოტი გავუშვით, ყოველგვარი მარკეტინგული აქტივობის გარეშე, 3 თვეში, მოგვემატა 10 000 მომხმარებელი. საშუალოდ თვეში 5 000 მომხმარებელი გვემატება და აქედან ბევრი ჩვენს სერვის უკვე მეორედ იყენებს.

ახლა მიმდინარეობს ჩატბოტის დაჭკვიანება, შესაბამისად, მთავარი შედეგები ჩატბოტს ჯერ არ დაუდია და ყველაფერი წინ არის. 2023 წელს გვინდა მარკეტინგული აქტივობების გაშვება, რომელიც მომხმარებელთა რაოდენობას გაზრდის,“ - ამბობს Geparts -ის დამფუძნებელი, პაატა ბერიაშვილი.