Georgian Greens-ის თერმულად დამუშავებული ბოსტნეულის პასტები კატარშიც გაიყიდება
Georgian Greens-ის თერმულად დამუშავებული ბოსტნეულის პასტები კატარშიც გაიყიდება.
კომპანიის დამფუძნებელი ეკატერინე ვეფხვაძე "ბიზნესპარტნიორთან" აცხადებს, რომ საწარმო ფოკუსირებას ზოგადად, საერთაშორისო ბაზრებზე გეგმავს.
მათ შორის, პასტების ნიმუშები უკვე გაგზავნილია კატარის, დუბაის, ისრაელისა და ჩეხეთის მიმართულებით. პირველ დიდ შეკვეთას კომპანია, კატარში, დოჰას "ლულუს" ჰიპერმარკეტების ქსელში, მიმდინარე თვეში გაგზავნის. საწარმომ FDA სერტიფიკატიც მოიპოვა და ამერიკის ბაზრის ათვისებაზეც მუშაობს.
„ამერიკის შეერთებულ შტატებში პოტენციურ დამკვეთებთან უკვე გვაქვს მოლაპარაკებები და ვვარაუდობთ, რომ ამ მიმართულებასაც მალე ავითვისებთ. რაც შეეხება ჯემების მიმართულებას, ვაწარმოებთ, როგორც შაქრიან, ასევე უშაქრო პროდუქტს. სხვადასხვა საინტერესო გემოების კომბინაციის ჯემები გაყიდვაში მომავალი თვიდან ჩაეშვება.რაც შეეხება ექსპორტს, ჯემებიც პასტების მიმართულებებს მიებმება. პირველი დიდი გზავნილი, ამ შემთხვევაშიც, დოჰას "ლულუს" ჰიპერმარკეტების ქსელში განცოხრიელდება,“- აღნიშნავს Georgian Greens-ის დამფუძნებელი, ეკატერინე ვეფხვაძე.
მისივე ინფორმაციით, Georgian Greens-ის თერმულად დამუშავებული ბოსტნეულის პასტებზე მოთხოვნა მზარდია. თვიდან თვემდე რეალიზაციის მაჩვენებელი დაახლოებით 20%-ით იზრდება.
საწარმო 13 დასახელების პროდუქტს აწარმოებს, რომელთა რეალიზაციასაც, ადგილობრივ ბაზარზე, "ევროპროდუქტში", "წერტის" ქსელებსა და "ვოლტ მარკეტზე" ახორციელებს.
