გაკოტრების ახალ კანონს ბიზნესი უფრთხის
გადახდისუუნარობის ახალი კანონი 6 თვეა ძალაშია, თუმცა, ბიზნესის მიმართვიანობა საკმაოდ დაბალია. ამ დროისთვის, მხოლოდ 5 საქმეა გახსნილი, აქედან სამი გაკოტრების, ხოლო ორი რეაბილიტაციის საქმეა.
სპეციალისტების შეფასებით, ბიზნესი სიფრთხილით ეკიდება და ახალი მექანიზმების პრაქტიკაში გამოყენებას არ ჩქარობს.
„ეს არის ძალიან საინტერესო კანონი და კარგ პრაქტიკას გვაჩვენებს ბევრ საკითხთან მიმართებაში. თუმცა, სამწუხარო ის არის, რომ ბიზნესისთვის არ არის კარგად ცნობლი ამ მექანიზმის შესახებ. ასევე გარკვეული სიფრთხილეა ახალი კანონის მიმართ და ელოდენიან როგორ იქნება პრაქტიკაში დანერგილი. ალბათ, ეს 6 თვე ამიტომაც იყო ნაკლები აქტიურობა - ყველა უფრთხოდა ყოფილიყო პირველი და გაეკვალა გზა. რასაც ვხედავ, ჩემი პირადი მაგალითით, კანონი მართლა კარგად მუშაობს. ჯერ კიდევ ძალიან დიდი სტიგმაა საზოგადოებაში გაკოტრების საქმეში შესვლასთან დაკავშირებით და ამ საკითხზე USAID-სთან ერთად ვმუშაობთ ცნობადობის გაზრდაზე,“ - განუცხადა „ბიზნესპარტნიორს“ ბიზნესის გადახდისუუნარობის პრაქტიკოსთა ასოციაციის ხელმძღვანელმა ნანა ამისულაშვილმა.
ახალი კანონი, რომლმაც ქვეყანაში გაკოტრების პროცედურა ფაქტობრივად, სრულად შეიცვალა, 1 აპრილიდან ამოქმედდა. კანონმდებლობაზე მუშაობა წლების განმავლობაში მიმდინარეობდა. ცვლილებების მიზანი პროცესის ეფექტიანობის გაზრდა და საწარმოთა რეაბილიტაციის მაჩვენებელბის ზრდა იყო.
