გაბუნია GMP სტანდარტზე: ადგილობრივ მწარმოებელებსა და იმპორტიორებთან თანაბარი მიდგომა უნდა იყოს

GMP-ს, ანუ კარგი საწარმოო პრაქტიკის სტანდარტის მოთხოვნა იმპორტირებულ პროდუქტზეც სავალდებულო გახდება, - „წამლისა და ფარმაცევტული საქმიანობის შესახებ" კანონში ცვლილებების პროექტი ჯანდაცვისა და სოციალურ საკითხთა კომიტეტმა პირველი მოსმენით განიხილა.

ჯანდაცვის მინისტრის მოადგილე მიიჩნევს, რომ კანონში ცვლილებები ჯანსაღ კონკურენციას შეუწყობს ხელს, ადგილობრივ მწარმოებლებსა და იმპორტიორებს შორის თანაბარი მიდგომა უნდა იყოს, ასევე მნიშვნელოვანია ხარისხის უზრუნველყოფის გარანტიები.

მინისტრის მოადგილემ კიდევ ერთხელ განმარტა, რომ ფარმაცევტული პროდუქტის მწარმოებლებისა და საბითუმო რეალიზატორებისათვის, 2022 წლის პირველი იანვრიდან, ძალაში შევიდა GMP (კარგი საწარმოო პრაქტიკა) და GDP (კარგი სადისტრიბუციო პრაქტიკა) სტანდარტის მოთხოვნები. თუმცა GMP-ის (კარგი საწარმოო პრაქტიკა) სერტიფიკატი, სავალდებულო წესით, არ მოითხოვება იმპორტირებული ფარმაცევტული პროდუქტებისთვის, რაც ამ უკანასკნელთ აყენებს პრივილეგირებულ მდგომარეობაში ფარმაცევტული პროდუქტის მწარმოებლებსა და საბითუმო რეალიზატორებთან მიმართებაში.

"ამ დროისთვის მიზანშეწონილად იქნა მიჩნეული, ფარმაცევტული პროდუქტის GMP-ის (კარგი საწარმოო პრაქტიკის) სტანდარტით წარმოების დამადასტურებელი საბუთის მოთხოვნა ფარმაცევტული პროდუქტის იმპორტიორებისთვის, რათა უზრუნველყოფილი იქნეს თანაბარი მიდგომები ფარმაცევტული პროდუქტის მწარმოებლებს, საბითუმო რეალიზატორებსა და ფარმაცევტული პროდუქტის იმპორტიორებს შორის", განაცხადა თამარ გაბუნიამ.

კანონპროექტით გათვალისწინებულია გარკვეული გარდამავალი პერიოდი იმისთვის, რომ განისაზღვროს დეტალურად ეტაპები და პირობები უკვე ბაზარზე არსებული იმპორტირებული პროდუქტებისთვის GMP სტანდარტის მოთხოვნებთან შესაბამისობის უზრუნველყოფის მიზნით.

კანონპროექტს პარლამენტი დაჩქარებული წესით იხილავს.