ელექტრონული ვაჭრობისას მომხმარებლის უფლებებს კანონი დაიცავს
მომხმარებლის დაცვა ელექტრონული კომერციის პროცესში და ახალი ვალდებულებების შემოტანა შუალედური სერვის პრვაიდერებისთვის - ამ საკითხებს ითვალისწინებს „ელექტრონული კომერციის შესახებ“ საქართველოს კანონის პროექტი, რომელიც ჯერჯერობით, საჯარო-კერძო დიალოგის ფორმატში განიხილება.
კანონპროექტის ავტორების განცხადებით, მიზანი ელექტრონული ვაჭრობის პროცესში მომხმარებლის უფლების დაცვა და სანდოობის უზრუნველყოფაა.
როგორც „ბიზნესპარტნიორს“ კანონპეროექტის შემუშავებაში ჩართულმა ექსპერტმა უჩა სეთურმა განუცხადა, ამ პროცესში განისაზღვრა ონლაინ სერვის პროვაიდერების როლი. არსებობს მათი სამი კატეგორიაა - ინფორმაციის გამტარი, ქეშერი და ჰოსტერი. გადაწყდა, რომ ე.წ. ქეშ ოპერატორებს, ანუ ინფორმაციის შემნახველ ოპერატორებს დაეკისროთ, რომ პრობლემის დაფიქსირების შემთხვევაში, ჩამოხსნან ონლაინ სივრცეში უკანონოდ განთავსებული ინფორმაცია თუ კონტენტი.
„ჩვენ ვართ დიდი ციფრული სივრცის ნაწილი და საკმაოდ დიდია წილი ჩვენი მომხმარებლებისა, რომლებიც ონლაინ ყიდულობენ პროდუქციას. მათ შორის საქართველოშიც. საბუარია იმაზე, რომ არ არის დადგენილი სტადარტი. შესაძლოა, ციფრული ოპერატორების უმეტესობას მაღალი სტანდარტები აქვს, მაგრამ ხშირია შემთხვევები, როცა მოხმარებელთა უფლებები ირღვევა, მოხმარებელს კი არანაირი ინფორმაცია არ აქვს - არც ხელშეკრულება, არც პირობები, არ არის ინფორმირებული, გადამზიდავი ატყუებს. მთავარი მიზანი არის ის, რომ მომხმარებელი დავიცვათ და ეს არის ამოსავალი წერტილი ამ კანონში. ასევე, ის, რომ ჩვენი ელექტრონული ვაჭრობის სივრცე იყოს სანდო, იმ ღირებულებებზე დაყრდნობილი, რომელიც ევროპული დირექტივით არის განმტკიცებული“ - აცხადებს უჩა სეთური „ბიზნესპარტნიორთან“.
დღეის მდგომარეობით, საქართველოში ელექტრონული კომერციის სექტორი სპეციალური მარეგულირებელი კანონის გარეშე ფუნქციონირებს და აღნიშნული სფერო გარკვეულწილად სხვადასხვა კანონის ცალკეული დებულებებით არის მოწესრიგებული.
