ჩეხი ინვესტორები საქართველოში ინვესტირებით ინტერესდებიან
ჩეხი ინვესტორები საქართველოში ინვესტირებით ინტერესდებიან. სააგენტო "აწარმოე საქართველოში" ჩეხეთში ვიზიტის ფარგლებში სამიზნე კომპანიებს შეხვდა. ვიზიტის ფარგლებში კომუნიკაცია სააგენტოსა და უმსხვილეს სასტუმროების, ავტონაწილების მწარმოებელ და ერთ-ერთ მოწინავე IT და Bpo კომპანიებს შორის შედგა.
როგორც სააგენტოს დირექტორის მოადგილემ, თორნიკე ზირაქიშვილმა "ბიზნესპარტნიორთან" განაცხადა, სამივე მიმართულებით უკვე დაიგეგმა კონკრეტული ბიზნეს ნაბიჯები. ყველაზე გამოკვეთილ პროექტად სააგენტოში IT და Bpo-ს მიმართულებას ასახელებენ. თორნიკე ზირაქიშვილის განცხადებით, ჩეხური კომპანიის დაინტერესება განსაკუთრებით ქვეყანაში არსებულმა საგადასახადო შეღავათებმა განაპირობა. კომპანია კონკრეტული პროექტის საქართველოში განხორციელებას გეგმავს, რომლის ფარგლებშიც 50-ზე მეტი აიტი დეველოპერი დასაქმდება.
რაც შეეხება ავტონაწილების მიმართულებას, თორნიკე ზირაქიშვილის თქმით, ჩეხური კომპანია საერთო პროექტების წარმოებას განიხილავს. ამასთან, შესაძლებელია კომპანიებს შორის სადისტრიბუციო შეთანხმებებიც დაიდოს.
