"ბებიას“ პროდუქციაზე მოთხოვნა მზარდია
სოციალური საწარმოს - „ბებიას“ პროდუქციაზე მოთხოვნა იზრდება.
როგორც საწარმოს თანადამფუძნებელმა, მარიამ ხუტუაშვილმა „ბიზნესპარტნიორთან“ განაცხადა, მომხმარებლის მოთხოვნიდან გამომდინარე, უფრო მრავალფეროვანი გახდა ასორტიმენტიც. დღეს ბებიები ქუდებთან ერთად, ყველა ასაკისთვის გათვლილ, ხელთათმანებს, წინდებსა და შარფებსაც ქსოვენ.
„ბებიას“ პროდუქციის შეძენა სოციალურ ქსელებთან ერთად სოციალური კონცეფციის მაღაზია „ესკიშიცაა“ შესაძლებელი.
სოციალურ საწარმოთა ალიანსის დირექტორი, სალომე კუსიანიც „ბებიას“ პროდუქციაზე მზარდ მოთხოვნაზე ამახვილებს ყურადღებას და ამბობს, რომ ბებიების ნაქსოვი ნატურალური ნაწარმი უცხოელებისთვისაც მიმზიდველია.
„როგორც ქართველ, ასევე უცხოელ მომხმარებლებში სოციალური დარტვირთვის მქონე ნივთებისადმი დაინტერესება მზარდია. „ბებიას“ ნაწარმი ძალიან დიდ მოწონებას იმსახურებს მათში და გარდა ამისა, როდესაც იგებენ თუ რა ტიპის სოციალური მისია დგას მათ მიღმა და მომხმარებლების მიერ სოციალურად პასუხისმგებლიანი შესყიდვით ვის ვაძლიერებთ დაინტერესება კიდევ უფრო მეტად იზრდება,“ - ამბობს სალომე კუსიანი.
ცნობისთვის, სოციალური საწარმო „ბებიას“ 3 წლის წინ შეიქმნა. დღეს ნატურალური თუშური შალით ხელნაკეთ აქსესუარებს 15-მდე ბებია ქსოვს.
