"ბებიას" ნაქსოვი აქსესუარები ქვეყნის ფარგლებს გარეთაც გაიყიდება

სოციალურ საწარმო „ბებიას“ გაფართოების გეგმები აქვს. როგორც საწარმოს თანადამფუძნებელი, მარიამ ხუტუაშვილი „ბიზნესპარტნიორთან“ განმარტავს, უცხოელი მომხმარებლების დიდი დაინტერესებიდან გამომდინარე, „ბებიას“ საკუთარი პროდუქციის ქვეყნის ფარგლებს გარეთ გატანა აქვს დადგეგმილი. 

კომპანია პროდუქციის ნიდერლანდებსა და ამერიკაში გატანას და გამოფენა-გაყიდვებში მონაწილეობას გეგმავს. ამ ეტაპზე საწარმო აღნიშნულ ქვეყნებში პარტნიორებს ეძებს.

„უმეტესობა გარე მარკეტებზე ვინც ყიდულობდა და ძალიან აღფრთოვანებული იყო ჩვენი იდეით, იყვნე უცხოელები. აქედან გამომდინარე, მივხვდით, რომ მარტო ქართული ბაზრისთვის ეს ყველაფერი არ იყო საკმარისი და გვინდა ექსპორტზე გასვლაც. უკვე გავაკეთეთ  Etsy-ზე, თუმცა,  უცხოური ბაზრების ათვიზების მიზნით გეგმაში იქაურ გამოფენა-გაყიდვებში  მონაწილეობა შედის,“ - აცხადებს მარიამ ხუტუაშვილი.

ვინაიდან ბებიების საქმიანობა ახლა მხოლოდ სეზონურია,კომპანიის  სამომავლო გეგმებში სამკერვალოს შექმნაც შედის. ამ ეტაპზე, სოციალური საწარმო დაფინანსების ძიების პროცესშია.

ცნობისთვის, სოციალური საწარმო „ბებიას“ 3 წლის წინ შეიქმნა. დღეს ნატურალური თუშური შალით ხელნაკეთ აქსესუარებს 15-მდე ბებია ქსოვს.