ბათუმში კომპანია "ცეზარის“ საფირმო მაღაზიამ არ გაამართლა

რძის პროდუქტების მწარმოებელი კომპანია „ცეზარის“ საფირმო მაღაზიამ ბათუმში არ გაამართლა, ვერ მოიტანა ის შედეგი, რა მოლოდინიც იყო, - ამის შესახებ „ბიზნესპარტნიორს“ კომპანიის დამფუძნებელმა ცეზარ კახაძემ განუცხადა.

„პროექტში დაახლოებით 0,5 მლნ-ზე მეტის ინვესტიცია ჩაიდო, თუმცა, უშედეგოდ. დახურვას არ ვაპირებ, ვიმედოვნებ, სიტუაცია გამოსწორდება. ბათუმში გათვლა იყო ტურისტებზე, თუმცა, გამომდინარე იქიდან, რომ პანდემიის გამო ტურიზმი თითქმის გაჩერდა, ამან გავლენა მოახდინა,“ - აღნიშნავს კახაძე.

კომპანია „ცეზარი“ ამ დროისთვის რამდენიმე დასახელების რძის პროდუქტს აწარმოებს. მათ შორის, თვეში 10 ტონა წარმადობით მაწონს, 10 სახეობამდე ყველს, რძეს, კარაქს. სექტემბერში დაგეგმილია არაჟანის წარმოების დაწყებაც.

კომპანია „ცეზარი“ ხულოსა და წალკაში 2 საწარმოს ფლობს და 40-მდე ადამიანს ასაქმებს.