სარწყავი არხების მოწყობა-რეაბილიტაციაზე წელს 48 მლნ დაიხარჯება
საქართველოს მელიორაცია ფერმერებისთვის სარწყავი წყლის მიწოდების უზრუნველსაყოფად და სარწყავი არხების რეაბილიტაციისთვის წელს 48 მლნ ლარს დახარჯავს.
როგორც „საქართველოს მელიორაციის“ გენერალური დირექტორმა „ბიზნესპარტნიორს“ განუცხადა, თანხა სრულად მოხმარდება არსებული ინფრასტრუქტურის აღდგენა-მოწესრიგებას.
დავით წითლაძის განმარტებით, სარწყავი სეზონი სტაბილურად ყველგან გათვალიუსიწნებულ ვადებში დაიწყება.
„შეიძლება გარკვეული გამონაკლისები იყოს იმ არეალებში, სადაც ტექნიური ხარვეზია ან სარემონტო სამუშაოები მიმდინარეობს. ამინდებმა კონკრეტულ ლოკაციებზე გარკვეულწილად ჩვენი სამუშაოებიც შეაფერხა. შედეგად, შესაძლოა, რამდენიმე დღის დაგვიანებით მოხდეს წყლის გაშვება, თუმცა გვაქვს მოლოდინი, რომ სარწყავი წყალი ყველას სტაბილურად მიეწოდება იმ შესაძლებლობით, რაც გვაქვს ამა თუ იმ სარწყავ სისტემაზე,“ - განაცხადა დავით წითლაძემ.
მისივე განმარტებით, ბოლო პერიოდში სამელიორაციო სისტემების სარეაბილიტაციო სამუშაოების დაფინასნება პერმანენტულად იზრდება.
„გარდა საბიუჯეტო დაფინანსებისა, გვაქვს დონორების დაფინანსებაც, მათ შორის მსოფლიო ბანკის მხარდაჭერაც. წლევანდელი ჩვენი კაპიტალური სახსრები 48 მლნ ლარია. რაც მთლიანად მოხმარდება სამელიორაციო ინფრასტრუქტურის აღდგენას,“ - განმარტა „საქართველოს მელიორაციის“ გენერალურმა დირექტორმა.
მისივე ინფორმაციით, სარწყავი წლის ტარიფი სახელმწიფოს მიერ სუბსიდირებულია და სიმბოლური ხასიათისაა, თუმცა სემეკი სატარიფო მეთოდოლოგიის დანერგვასა და ახალი ტარიფების დადგენასთან დაკავშირებით მუშაობს.
„აღმოსავლეთ საქართველოში სარწყავი წყლის ტარიფი ერთ ჰექტრარზე 75 ლარი, დასავლეთ საქართველოში კი 40 ლარია. მიმდინარეობს მუშაობა ახალ სატარიფო მეთოდოლოგიაზე და ტარიფის შემუშავებაზე, თუმცა მიმდინარე წელს ტარიფის შეცვლა არ იგეგმება,“ - განაცხადა დავით წითლაძემ.
